Segun Parlamentario Endy Croes:
Un ley caminda bo por drenta pero nunca lo por sali
ORANJESTAD (AAN): Fraccion di MEP den Parlamento tin preocupacion grandi y ta preparando un reunion otro siman cu tur sindicato pa motibo cu no obstante cu mas di 10 mil persona a firma contra ley di Reino HOFA, y cu 13 sindicato cu ta representa mas di 10 mil empleado a protesta contra HOFA, y no obstante cu profesor di Hulanda a splica ya for di algun tempo caba, cu e ley di Reino aki ta contra constitucion di nos pais, Gobierno AVP-Futuro a dal bay cu e ley aki toch, segun e Parlamentario Endy Croes.
El a bisa cu dia 6 di maart ultimo, Gobierno a bolbe duna bendicion pa manda e ley di Reino actual pa Raad van State y unabes cu Raad van State keda cla, e ley di Reino ta wordo trata den tweede kamer na Hulanda. Parlamentario Croes a bisa cu ora cu e ley keda fiho, no lo tin salida mas. El a compar’e cu ‘Hotel California’ remarcando cu Aruba lo drenta un avenida cu nunca mas nos lo sali di dje.
“Fraccion di MEP ta lamenta esaki masha hopi. A logra baha e ley di Reino COHO for di mesa. Y e 20 puntonan cu gobierno anterior a logra haci ‘onderlinge regeling’, e gobierno actual a hinca nan for di porta patras hunto cu Hulanda den e ley di Reino HOFA”, e parlamentario a remarca.
Segun e parlamentario, pa logra sali for di e ley di Reino aki, ta bay ta un martirio. Parlamentarionan di AVP, menos Mike de Meza, ta pro e ley. Y Futuro completo ta na fabor tambe. Tur 8 parlamentario di Fraccion di MEP ta contra e ley, PPA tambe ta contra e ley, y Parlamentario de Meza tambe a expresa publicamente cu e ta contra e ley HOFA.
“Nos ta falta un of dos parlamentario balente ainda pa nos por frena esaki. Mi no ta kere cu e lucha sagrado di nos Status Aparte di señor Betico Croes (dfm) y di henter e pueblo cu e tempo ey a sostene e vision aki, unda cu a pasa un caminda di cruz pa por a convence Hulanda, pa awe nos tin nos propio Parlamento, nos propio Conseho di Minister, nos propio florin, nos himno y bandera, nos Banco Central, nos Raad van Advies, nos Contraloria General, entre otro, y awo kier entrega parti di e bunita lucha aki bek den man di Hulanda y aya nan ta bay dicidi kico nos ta bay haci na Aruba. Nos no ta bay acepta esaki”, el a enfatisa.
Parlamentario Croes a menciona cu sigur luna di mei aki lo ta un luna decisivo hunto cu tur cu kier para fuerte pa nos autonomia. “Movimiento Electoral lo trek y guia e proceso aki tambe pa salvaguardia nos autonomia”, el a bisa.
