Parlamentario di Fraccion di MEP Endy Croes:
- Lo no spaar 800 miyon Florin pero 8 miyon Florin pa aña riba e prestamo di Covid
ORANJESTAD (AAN): Parlamentario di Fraccion di MEP, Endy Croes a splica cu recientemente Gobierno di Aruba a duna un splicacion den Parlamento den un comision porta cera, riba e tema di ‘rente besparing’. El a enfatisa cu desde 29 di augustus ultimo, discusionnan a cuminsa despues cu Gobierno a anuncia cu Conseho di Ministro di Reino, e mainta ey a trata e ley di HOFA.
Rijkswet HOFA, e parlamentario a bisa, ta e ley cu Gobierno AVP - Futuro, Prome Minister Eman, Minister Geoffrey Wever y Minister Gerlien Croes a firma pa entrega nos autonomia finaciero den man den Hulanda, mencionando cu e ta un hybrid. Esaki el a splica, cu den e ley di Reino cu a wordo trata na Hulanda, tin un otro landsverordening cu lo mester wordo trata den Parlamento. E dos leynan aki ta hunto y unabes cu aproba un den Parlamento, por considera cu Aruba a entrega su autonomia
Parlamentario Croes a expresa cu Gabinete Eman a haci esaki tras di lomba di Parlamento, sin informa Parlamento y a splica cu desde augustus 2025, e gobierno a bende esaki informando cu lo spaar masha hopi placa riba interes.
Segun informacion cu e parlamentario a presenta, dia 17 di maart ultimo, den porta di Himno y Bandera, Minister Gerlien Croes, kende segun e parlamentario, ta esun cu ta pusha e agenda pa entrega nos autonomia, a expresa cu Aruba tin un himno, un bandera y nos Parlamento pa trata presupuesto. E minister e tempo ey, hungando politica, a enfatisa tambe cu niun hende por kita esakinan di nos. Den mesun palabranan expresa door di Minister Gerlien Croes, e ta bisa cu “boso miedo ta pa Aruba haya 800 miyon Florin”.
Segun e parlamentario, Minister Croes ta hungando politica y un biaha mas ta gar’e ta gaña mescos el a gaña Parlamento tocante su via e jet priva. “Esaki ta e di dos gañamento literalmente di Minister Gerlien Croes pasobra su colega Minister Geoffrey Wever a splica den reunion publico den Parlamento, cu ta e prome biaha cu Gobierno ta haya informacion di cuanto placa Aruba lo spaar aparentemente ora cu entrega autonomia bek na Hulanda.
El a agrega cu e den e raportnan cu nan a mustra, Minister Wever a splica cu tres organizacion entre otro BZK, Directie Financien y CAft a haci calculacionnan separa riba e prestamo di Covid di 916 miyon Florin, den e trayecto di 20 aña, Aruba lo spaar 128 miyon Florin. “Ora cu calcula esaki den e añanan cu ya a paga, y kita esaki, e ta bira 8 miyon Florin pa aña. Y no 800 miyon Florin pa aña, manera Ministernan Gerlien y Geoffrey y Prome Minister Eman na cuminsamento a gaña nos pueblo”, Parlamentario Endy Croes a duna di conoce.
