Eduard Pieters (PPA):
ORANJESTAD (AAN): Durante e rueda di prensa semanal di fraccion di PPA, parlamentario Eduard Pieters a lanta un acusacion grave: San Nicolas no ta haya chens pa desaroya y structuralmente ta haya boycott.
Segun Pieters, loke pueblo ta mira como incidente aisla, ta en realidad un patronchi di decision politico, cu ta frena progreso di e region.
E punto di salida ta e reciente caso di ex-parlamentario y ex-minister Benny Sevinger, unda e hueznan di Hulanda a determina cu e terenonan di gran balor na e parti Noord di nos isla, tabata obteni di forma ilicito. Pa Pieters, e reaccion di gobierno ta alarmante: silencio hermetico. “En bes di exigi e autornan pa haya e terenonan aki bek, gobierno ta mira otro banda,” el a indica. Pa Pieters, esaki no ta djis un falta di accion, pero un falta di proteccion di patrimonio nacional, cu ta pertenece na pueblo di Aruba.
Mientras gobierno ta papia di sostenibilidad y “bon comun” den conferencia y evento, realidad ta otro. Segun Pieters, e mesun terenonan ilicitamente obteni aki ta pa planifica pa construccion di rond di 600 camber extra.
“Mientras pueblo ta boga y sclama pa stop construccion di hotel y di mas camber di short term vacation stay, esaki ta e oportunidad pa gobierno para construccion di 600 camber. Sinembargo den practica gobierno door di no tuma accion ta permiti mas construccion,” el a critica. Pues un biaha mas ta demostra, cu duna discurso bunita relaciona cu bon comun y sostenibilidad ta algo, pero tuma decision y accion ta completamente diferente.
Boycott contra San Nicolas ta bira evidente: Pero pa Pieters, e caso aki ta parti di algo hopi mas grandi: un boycott structural contra San Nicolas. El a pone un ehempel directo: e proyecto di Hotel Secrets, cu ta sigui e proceso legal, conforme voorbereidingsbesluit riba e ROPV pa desaroya mas camber na San Nicolas, ta wordo frena. Segun Pieters, esaki ta contradictorio cu e promesanan politico cu e partidonan a haci durante campaña pa revitalisa e area.
“San Nicolas a haya un oportunidad pa crece, pero gobierno ta tranca e proceso,” el a bisa.
Pieters a mustra cu e boycott no ta limita na un proyecto so. El a menciona e mocion di honorabel miembro di parlamento, señora Tomasia pa pone asfalt riba e Plenchi di Santa Teresita, cu a pasa for di aña pasa, pero te ainda no a cuminsa cu accion mes. E realidad? Falta di infrastructura, falta di siguridad y falta di prioridad, mientras cu e area ta sigui bay mas atras.
Un ciudad den scuridad: Un di e imagenan mas fuerte cu Pieters a pinta ta e situacion di e trahadornan y residente cu mester move den scuridad, pasobra iluminacion no ta adecuado riba e caminda di bay pa Hotel Secrets. “Nos hendenan mester core den scuridad te ora algo pasa?,” el a puntra. Pa Pieters, esaki ta inaceptabel den un pais, cu ta genera miyones for di turismo.
E mensahe final di Pieters ta uno cu no por ignora. San Nicolas no ta un proyecto politico, no ta un slogan di campaña, ta un comunidad cu merece respet, inversion y accion real. “Gobierno mester stop di papia di desaroyo y cuminsa actua pa tin desaroyo,” el a conclui. “Paso si nos continua asina, no ta cuestion cu ta djis lubida riba San Nicolas, sino ta bezig ta sacrificando San Nicolas.
