ORANJESTAD (AAN): Den un mundo unda innovacion tecnologico ta avansando rapidamente,
Aruba ta keda atras den areanan crucial — for di infrastructura digital te na regulacionnan den areanan manera Fintech, Cryptocurrency, Forex (currency trading) y online trading.
Den un carta fecha 11 di april 2025, Parlamentario Carlos Bermudez di fraccion di AVP, a solicita na Presidente di Parlamento, sr. Marlon Sneek, pa percura pa un serie di pregunta cu e ta dirigi na Minister Geoffrey Wever, yega na oficina di e mandatario.
Ta esencial pa nos tuma pasonan serio pa diversifica nos economia, cu atencion special pa sectornan manera Fintech, mercado di Crypto currency, Forex (comercio di moneda) y comercio di stock\accion.
E sectornan aki, cu ta conecta na e economia mundial di mañan, ta ofrece oportunidadnan no solamente pa crecemento economico, pero tambe pa crea cuponan di trabou, specialmente pa nos hobennan, cu hopi biaha ta buscando camindanan nobo y innovativo pafo di sectornan tradicional.
Hobennan ta anhela un solucion (Win-Win) caminda cu lo paga belasting local envez di tin cu busca construccionnan complica den exterior cu e consecuencia cu lo NO paga e belasting akin a Aruba.
Parlamentario Bermudez ta menciona cu aunke ta referi na hobennan, e sectornan menciona lo por wordo uza pa tur esnan cu ta interesa.
Tumando na cuenta cu Minister di Finansa, Economia y Sector Primario den pasado a hiba combersacionnan encuanto dicho sectornan, parlamentario Bermudez ta acerca minister cu e siguiente preguntanan:
Dia 7 di februari Minister Wever a tene un reunion cu Comision Economico di Nacionnan Uni pa Latino America y Caribe (UN-ECLAC) den cuadro di un estudio enfoca riba entre otro Fintech, Blockchain y Cryptocurrencies. Minister por indica ki dia lo termina e estudio aki y ki dia Staten di Aruba lo haya un copia di e rapport?
Durante e siman di 3 pa 7 di februari, un delegacion di UN-ECLAC a tene consulta cu
diferente stakeholders, entre otro Banco Central di Aruba, Camara di Comercio,
ATIA, y Asociacion di Bankeronan di Aruba. Minister por indica si e stakeholdernan
aki ta positivo tocante e idea di diversificacion economico pa medio di sectornan
digital?
Si Aruba ricibi e relato final (UN-ECLAC) a corto plazo y e resultadonan ta positivo, Minister por indica ki dia lo tuma pasonan concreto pa habri acceso na e mundo financiero digital pa nos ciudadanonan di Aruba?
E gabinete di AVP–FUTURO tin pensa di uza experticio internacional pa traha of cambia e legislacion(nan) necesario pa sostene e transicion digital? Esaki cu e pensamento pa acelera e proceso como cu Aruba a keda atras riba e tereno aki pa algun tempo caba.
Minister Wever a considera caba of a tuma pasonan pa loke ta trata creacion di un structura fiscal atractivo pa sectornan emergente manera Fintech, e mercado di Crypto currency, Forex (comercio di moneda) y comercio di stock\accion?
Parlamentario Carlos Bermudez ta desea e contestanan por escrito y ta enfatisa cu e ta carga e esperansa cu pronto e portanan pa e mundo (financiero)digital habri pa nos cuidadanonan, pero ta insisti ariba un legislacion adecuado y regla claro pa garantisa un control estricto y alavez brinda un siguridad na tur e usuarionan.
