ORANJESTAD (AAN): Minister di Husticia Andin Bikker Dialuna mainta durante un conferencia di prensa riba e Crisis Plan Social, a hiba palabra.
E mandatario a trece dilanti cu for di 2010 ora cu e tabata den Parlamento el a forma parti di un comision special cu a formula recomendacionnan.
“Tabata recomendacionnan concreto y palpable cu di e tempo ey caba tabata realizable”.
Na 2016 dos comision lidera pa personanan den oposicion den Parlamento a constata cu mayoria recomendacion no a wordo ehecuta pa e Gobierno di e tempo ey, segun Bikker.
El a sigui bisa cu e recomendacionnan tabata pa duna informacion (voorlichting) na scolnan, mirando cu e leynan tey como ‘ultimo remedi’.
“Ora algo pasa bo ta bay castiga hende, pero bo ta un tiki laat pasobra e crimen a tuma lugar caba”.
A pidi tambe pa bin cu castigonan minimo, pa kita tambe e asina yama ‘verjaringstermijn’ pasobra tin hende cu despues di varios aña ta bin dilanti pa indica cu por ehempel un persona a abusa di nan sexualmente hopi aña pasa, segun e mandatario.
Kitando e verjaringstermijn ta pone cu un persona por wordo persigui penalmente pa un crimen cu el a comete varios aña atras.
E minister a trece dilanti tambe cu un otro recomendacion cu tabata tin y Gobierno anterior no a cumpli cune tabata pa bin cu Bureau Sostenemi pa apunta esaki como un punto central pa meld y coordina.
A pidi tambe pa mehora e cooperacion entre specialistanan y pa introduci un Kinderombudsman.
“Asina tabata tin un lista di cos cu a wordo recomenda for di 2010 caba y na 2016 a wordo constata cu e ministernan no a haci net net nada”.
Esaki segun Bikker, kende a sigui bisa cu Gabinete Wever Croes di a traha un plan y via un ley a aloca fondonan disponibel di alrededor di 30 miyon florin.
El a splica tambe cu na 2019 a introduci parcialmente e Codigo Civil cu ta hacie posibel pa pone Bureau Sostenemi como punto central pa meld y coordina tur cos.
“Na 2020 no obstante e pandemia nos a hisa e castigo penal maximo”.
Nos a mustra con abao e castigonan tabata, nos a hisa tur y nos a kita e posibilidad pa un crimen caduca door di tempo.
Tambe nos a cambia articulo 137 di nos Codigo Penal unda cu libertad condicional pa un preso ta depende di gravedad di e crimen cu el a comete.
Nos a introduci tambe e Landsbesluit Meldcode Kindermishandeling (maltrato di mucha), segun e mandatario.
Bikker a gradici tur hende cu ta yudando cu e esfuerzonan rond di e Crisis Plan Social.
