Parlamentario Shailiny Tromp-Lee:
ORANJESTAD (AAN): Cu un sintimento di rabia profundo y indignacion absoluto, Parlamentario Shailiny Tromp-Lee a enfatisa un biaha mas cu e ta contra e forma dictatorial cu Gobierno di Aruba ta manehando e proceso di Rijkswet HOFA. E ta condena e manera scondi cu Gobierno ta trata e topico aki, sin brinda claridad y sin responsabilisacion.
Ta keda confirma, un biaha mas, cu transparencia pa e Gobierno aki ta un concepto inexistente y cu e respet pa nos institucionnan democratico ta wordo trapa.
Esaki no ta djis un fayo administrativo, esaki ta un atake directo riba nos autonomia y riba e representacion di pueblo.
Sin decensia y sin transparencia
Un gobierno arogante cu un biaha mas no tabatin e decensia basico pa informa Parlamento cu e asina yama ‘internetconsultatie’ a finalisa y cu nan a dicidi di sigui cu e proceso. Structuralmente nan ta faya pa brinda transparencia na Parlamento y pueblo henter. Bo lo puntra bo mes:
- Unda e respet pa Parlamento ta?
- Unda e respet pa e sindicatonan ta?
- Unda e oido pa e mas cu 10 mil firmantena cu a para firme contra e ley aki a keda?
Gobierno a opta pa keda keto, scondiendo informacion vital y ignorando completamente e preocupacionnan serio cu stakeholders a presenta. No tin ningun claridad si a tene cuenta cu ni un solo punto di critica, loke ta duna e impresion cu e consulta tabata un puro "show" pa cumpli formalmente.
Un Violacion di nos Constitucion y Palabracionnan
Loke ta mas alarmante ta e echo cu e Rijkswet HOFA aki ta bay directamente contra nos Constitucion. Gobierno a scohe pa mishi cu e fundeshi di nos estado di derecho pa complace interesnan externo, sin tin e consensus necesario.
Banda di esaki e proceso cu Gobierno ta encaminando ta un violacion concreto contra palabracionna haci durante IPKO y consehonan di Raad van State.
Mas pio ainda ta e echo cu desde un principio Gobierno ta actuando si Autorisacion: Gobierno a bay di acuerdo cu e concepto aki sin presenta esaki debidamente na Parlamento prome. Nan a bende nos autonomia sin cu e representantenan di pueblo por a bisa "A" of "B".
0 Informacion, 0 Responsabilidad
Nos ta biba bou di un maneho cu a faya structuralmente den su deber di brinda transparencia. E falta di informacion na pueblo di Aruba ta hunga un rol di "blackout" informativo consciente. Ta parse cu e meta principal di e Gobierno aki ta pa evita di duna cuenta, evita di wordo cuestiona, y actua manera un doño di tera en bes di un sirbidor di pueblo.
Na mi opinion e silencio di Gobierno ta papia mas cu nan palabranan. Ta un berguensa con ta trata nos leynan, nos institucionnan y nos futuro. Esaki ta inacceptabel! Nos no por y nos no mester sigui permiti pa e proceso aki sigui cana den scuridad, violando nos constitucion y ignorando e bos di esnan cu berdad ta stima e pais aki.
E forma di goberna aki mester stop awe mes. Henter pueblo di Aruba mester lanta y condena e actituda di Gobierno. Tur esaki ta sosodiendo den e celebracion di 40 aña di nos Status Aparte. Mirando e rumbo….ta kico tin di celebra?
