Fraccion MEP:
ORANJESTAD (AAN): Parlamentario Bermudez ta uza e comparacion di compra di un auto pa purba hustifica su acuerdo cu Rijkswet HOFA. Segun e, si un auto ya a wordo financia na banco y e auto ta na caminda, bo no por bisa despues cu bo no kier e auto mas.
Pero e comparacion aki ta robes, pasobra e ta laga un parti esencial afo!
E auto cu a wordo entrega no ta e auto cu bo a bestel
Imagina lo siguiente
- bo a bestel un auto automatico, pero ora e yega ta resulta cu ta standard.
- Bo a pidi un auto color geel, pero esun cu a yega ta berde.
- Bo a bestel un motor di 4 liter, pero esun cu ta wordo entrega ta 2 liter.
Den tur situacion normal, ningun consumidor responsabel, y cu ta paga pa e auto, lo acepta e auto. Bo lo bisa simplemente: “Esaki no ta e auto cu mi a bestel.”
Un auto cu bo no a bestel mester wordo entrega bek
Pa loke ta trata e situacion cu Rijkswet HOFA ta mescos cu e auto. E asina yama “bestuurlijk akkoord” por compara cu un bestelling inicial. Pero e ley cu awor ta riba mesa no ta igual na loke a wordo discuti originalmente.
Tur conseho huridico disponibel pa Bermudez tambe, ta confirma cu e “bestuurlijk akkoord” no ta obliga Aruba na nada. Esaki kiermen cu Mike Eman y Bermudez y Hart tin tur derecho pa bisa: “Esaki no ta e producto cu nos a pidi.”
Bermudez y Hart kier ta chauffeur pa Mike Eman
Enbes cu Bermudez y Hart para firme pa Aruba y bisa cu e ley mester wordo rechasa, Bermudez y Hart ta scoge pa bisa cu nos mester acepta e auto di tur manera.
Den otro palabra: e auto ta berde enbes di geel, ta standard enbes di automatic, y tin mitar di e motor cu a wordo pidi — pero nan ta bisa cu nos mester acept’e toch paso no por entreg’e bek.
Amor pa Aruba bo ta mustra ora bo para pa Aruba y no pa Hulanda
E Arubiano merece lidernan cu ta defende interes di e pais aki. Ora un acuerdo keda cla cu no ta bon pa Aruba, liderazgo berdadero ta nifica cu bo mester tin corahe pa bisa:
“Nos no ta acepta esaki.”
A bira tempo pa Bermudez y Hart mustra Mike Eman cu nan no lo ta entreguista manera Geoffrey Wever y Gerlien Croes!
