Fraccion di PPA ta presenta amienda pa pone placa disponibel pa e Centronan di Bario

Eduard Pieters miembro activo di PPA:

ORANJESTAD (AAN):  Recientemente fraccion di PPA a manda un invitacion na tur 10 presidente y/of miembro di directiva di e Centronan di Bario di  Aruba, pa un reunion interactivo cu nan, tocante nan preocupacion. Mester bisa cu esaki a resulta den un reunion hopi exitoso, ameno y fructifero. For di e reunion por a saca hopi informacion esencial, pa loke ta trata e maneho di e Centronan di Bario y tur e puntonan cu fraccion PPA a presenta den e reunion, tabata refleha den nan preocupacion- y dolornan. 

Respet y sosten pa trabou boluntario

Eduard Pieters di fraccion di PPA ta indica cu den pasado, el a yega di expresa cu “un comedo di webo no sa kico un  ponedo di webo ta pasa aden”. P’esey mes mester sinta y papia cu e personanan cu ta den veld y cu ta sa diariamente kico ta pasando y asina por compronde nan mihor. E personanan cu ta maneha e Centronan di Bario ta hacie boluntariamente. Pues ta di balora y mester brinda sosten na esunnan cu ta dedica nan tempo y disponibilidad na nos comunidad.

Mas ainda ora cu nan no ta haya ni un cen preto pa haci tur esaki. Alcontrario, tin di nan ta hasta hinca cen di nan mesun saco, pa e cosnan diario por cana manera mester ta. “Fraccion di PPA ta aplaudi e motivacion cu nan tin pa haci e trabounan den Centro di Bario, specialmente cu esaki ta un motivacion cu ta bin for di nan curason, pa e bienestar di nan bario, particularmente nos mucha- y hobennan”, Eduard a expresa.  

Insuficiente fondo no ta di awor!

Segun Eduard Pieters; “No ta di awor e preocupacion di mas grandi di nan ta e fondo. Esaki ta un topico cu ta bin for di hopi tempo atras caba y awor el a bira pio. E Centronan di Bario na Aruba tin scarsedad na fondo y boluntad di mas hende, pa nan por maneha un Centro di Bario manera mester ta”.  P’esey mes fraccion di PPA ta kere cu mester aloca mas fondo na e Centronan di Bario, pa nan por uza esaki efectivamente y asina nan por logra cumpli cu e metanan na bienestar general di formacion di nos comunidad.

“Gobierno mediante di CEDE Aruba ta aloca fondo pa e Centronan di Bario, pero e placa cu nan ta haya no ta suficiente, pa nan tin un maneho duradero, structural y adecuado di un centro. E centronan ta haci nan maximo y ta yega ora pa nan haya oido y respet pa e trabou inmenso cu nan ta haciendo”, segun Eduard.  

Amienda di fraccion PPA

Teniendo na cuenta tur loke a bin dilanti y tambe e vision di PPA, fraccion di PPA lo presenta un amienda den e presupuesto supletorio di Pais Aruba. Mirando cu Aruba tin un surplus, PPA ta propone pa bin cu un fondo di inversion netamente pa e Centronan di Bario. “Pues PPA un biaha mas lo lidera e accion pa bienestar di comunidad y ta spera di por conta cu madurez y boluntad di un y tur pa duna sosten, pero mas ainda respet na trabounan impagabel cu e centronan ta haci. Esaki no lo keda na un amienda so, pero lo traha un plan,  unda lo enfoca riba e 4 puntonan esencial pa cuminsa inverti den e ser humano, e programanan di educacion, pero tambe riba e parti di infrastructura”, Eduard a sigui elabora. 

Aruba ta conta cu 10 Centro di Bario y pa añanan largo nan a traha pa tene nan barionan sano, unda mucha, hoben y adulto di tur edad ta frecuenta y pasa tempo den un lugar save, unda nan por recrea y diberti.