Parlamentario John Hart na gobierno:
ORANJESTAD (AAN): Na opinion di Parlamentario John Hart di AVP, el a mira con pa dos termino consecutivo mandato, gabinete di coalicion cu signatura MEP a ignora señalnan fundamental cu tabatin pa cu un lista largo di problema cu ta afecta e pais aki.
Parlamentario Hart a pon’e di e siguiente manera: ‘Nan a wak con comehein ta cuminsa come kozijn bin abou, nan a wak e scheur den fundeshi y no a haci nada. Pero ora cu pueblo a saca nan fo’i cas, e ora ey nan ta tribi di puntra di con no a spuit contra comehein, di con no a fix e dak? Pero tur hende ta puntra nan mes: Di con bo no a drech’e ora abo a biba aden?’
El a splica cu MEP tabatin e oportunidad pa fortifica e poder di compra, pa duna pensionado un aumento riba e reparatietoeslag; echo ta cu no a hacie. Diferencia ta cu bou di e maneho di Gabinete AVP-Futuro awe alrededor di 20.000 pensionado si ta ricibi un aumento di 250 Florin, y alrededor di 4.000 persona cu derecho di pension di viudo of huerfano a ricibi un aumento. Door di a reduci accijns riba gasolin, a crea alivio financiero directo pa ciudadano y empresario cu efecto positivo riba costo di transporte y costo di bida.
Aki Hart a sigui bisa: ‘Mi ta consciente cu nos no ta ainda caminda nos mester ta, pero den e ultimo lunanan aki por conclui si cu esfuersonan haci cu sosten di fraccion di AVP den e nota di cambio di presupesto ta pa restaura e poder di compra. Pasobra surplus no ta un trofeo cu bo ta cana broma cu’ne; e ta un instrumento pa bo por duna back na bo pueblo, pa bo por duna back na bo comunidad.’
Pero e no ta suficiente pa restaura poder di compra so, of pa atende cu tur e barionan cu a neglisha tur e añanan aki; tin diferente asunto importante cu tambe mester atencion. Por ehempel e conseho di e rapport di CAft di april 2025 cu ta bisa cu e privatisacion di AWSS tin su riesgonan cu ne cu ta pone un presion grandi riba e presupuesto. Den caso cu AWSS no por cumpli cu su obligacion, e batata cayente lo bin back toch den scoch’i gobierno.
E advies di CAft na gobierno ta enfatisa lo siguiente: De verzelfstandiging brengt daarmee onvermijdelijk financiële risico’s met zich mee (contingent liabilities), die bij materialisatie een extra druk op de overheidsfinanciën leggen. Als AWSS haar verplichtingen niet kan nakomen, zal de overheid alsnog moeten ingrijpen om de continuïteit van de dienstverlening te waarborgen. Om deze redenen acht het CAft het van belang dat de AWSS tot de collectieve sector wordt gerekend. Tevens ontbreekt een adequaat toezichtmechanisme dat goed bestuur (corporate governance), solide financieel beleid en een ordentelijk financieel beheer borgt. Dit brengt grote risico’s met zich mee, zoals ondoelmatig gebruik van middelen.
Den comunicado di prensa di Gabinete AVP-Futuro na juni 2025, gobierno a menciona cu declaracion di e Colegio di Supervision Financiero di Aruba (CAft), ta indica cu e empresa estatal Aruba Wastewater Sustainable Solutions (AWSS N.V.) a haci prestamo innecesariamente caro riba e mercado liber.
Segun e comunicado di Gobierno, Caft a enfatisa cu esaki ta causa cu pais Aruba tin cu paga casi 200 miyon Florin di gasto extra y por lo tanto ta innecesario. CAft ta expresa duda den e manera con AWSS N.V ta maneha su asuntonan financiero. P’esey parlamentario Hart ta expresa: “No ban planta mata so, ban planta ordo tambe den trece claridad riba asuntonan importante di investigacion di fondonan di Pais Aruba”.
Hart a manda un serie di pregunta skerpi na gobierno pa tin claridad con leu e investigacion aki ta, kico precies ta investiga y con lihe por comparti e resultado cu Parlamento di Aruba. Mester evita cu ta ripiti locual cu a pasa den pasado caminda mayoria cu tabata sostene e gobierno di MEP-RAIZ a permiti cu pueblo di Aruba te dia di awe no tin claridad riba e contract di Eagle LNG, asina e parlamentario a expresa.
