Parlamentario Tevreden ta mira AVP kedando mudo
ORANJESTAD (AAN): Tur hende na Aruba ta dunando nan opinion riba Consensus Rijkswet HOFA. Hasta abo tin bo opinion riba e ley, ta Fraccion di AVP so ta mudo.
Parlamentario Hendrik Tevreden di MEP a declara riba esey: “Nos ta mira nan na tur evento, na cortamento di cinta, riba potret cu sonrisa. Pero ora cu ta bin na un tema fundamental pa autonomia di nos pais, silencio na paleis.”
Ta realmente incomprendibel cu despues di dos luna, e fraccion di AVP ainda no por fiha un posicion cla riba e Rijkswet pa Houdbare Overheidsfinanciën Aruba (HOFA). Nan a pidi dos siman pa lesa e ley, y djey nada. Un silencio hermetico. Un di nan a hasta bisa: “nos ta warda Raad van State (RvS) papia prome.” Pero pueblo di Aruba no a vota pa Raad van State. Pueblo a vota pa bo, pueblo a vota pa bo partido politico, abo tin cu defende interes di Aruba y no RvS
Ta con awo? Bo kier bisa mi cu un fraccion ta warda un entidad di Hulanda pa papia prome, pa djey bin cu nan mes opinion? Ban purba compronde e asunto ‘ki, paso aki nos ta papia di dos posibilidad: (*) Of nan mes no ta compronde e ley. (*) Of nan no kier carga responsabilidad politico riba nan schoudernan. Y esey ta un falta di respet pa e pueblo cu nan ta representa.
Fastball: Nan propio minister di finanzas a pasa nan un fastball, y di forma premedita a manda e concepto di ley prome cu Parlamento a hay’e pa mira. Hasta pa esaki, fraccion di AVP a guli manda abou, y ta laga minister Wever y su partido dirigi nan manera cu e kier, marionet’i Geoffrey. Mientras tanto, e realidad ta cu tin un Rijkswet riba nos mesa y no tin Gobierno pa duna informacion, no tin parlamentario di coalicion pa informa y mucho menos pa opina.
Paso ban serio, si e Rijkswet tabata asina bon, di con den nan mes propio verslag prome cu nan drenta gobierno, AVP a condena e Rijkswet? Y si e ley ta asina positivo, di con e veterano di AVP den Parlamento, sr. De Meza, si ta contra? Ta parce cu pa mantene coalicion riba pia, fraccion di AVP ta prefera di keda boca sera, laga nan principionan un banda, y sigui direccion cu partido Futuro kier bay.
Mientras AVP ta mudo, pueblo ta papia: Geoffrey cu Gerlien por silencia AVP, pero nan no por silencia un pueblo cu amor pa nan pais. Sindicatonan uni di Aruba y Bonaire ya a manda nan carta oficial bisando bon cla cu nan ta contra y ta bisa tambe pakico nan ta contra. Profesor Nicolai y Profesor Elzinga tambe a bisa cla cu e ley ta un riesgo pa autonomia financiero di Aruba y a hasta splica den placa chikito con e ley aki ta bay directamente contra di nos constitucion. Fraccion di MEP, PPA, y parlamentario De Meza ta contra. Diez mil hende cu a pone nan firma tambe ta contra. Parlamentarionan di AVP? Mudo.
Puntra bo mes: Unda AVP-Futuro ta para? (1) Band’i bo of banda di un Rijkswet cu ta limita bo derecho?
AVP ta mustrando Aruba cu nan tin un fraccion cu ta hopi den potret, pero chikito den palabra. Nos tin un fraccion cu ta cumprando tempo, pa miedo cu partido chikito saca plug di gobernacion y laga AVP sin Futuro.
