ORANJESTAD (AAN) -- E lider di Partido MEP, Evelyn Wever-Croes, contestando un pregunta di prensa na su salida despues cu el a reuni cu e Informadornan, a expresa tocante e bishita di señor Knops na Aruba, awe.
“Ayera, casualmente, nos tabata tin tambe un reunion cu Premier Rutte, Premier Pisas di Corsow, y Premier Jacobs di Sint Maarten. E tabata un bon reunion. Y siman pasa mi tabata tin un reunion cu CAft y cu señor Knops” e mandatario a splica, y el a señala cu awe e tin reunion atrobe cu Knops.
E dignatario a subraya cu nan sa tur e puntonan di salida di gobierno di Aruba, y gobierno di Aruba sa kico e tin cu cumpli cune.
“Y, enberdad, esey tur ta mustra cu nos mester yega na un gobierno, mas lihe cu ta posible”, Wever-Croes a reitera. “Nos no a sinta cu e partidonan pa yega na areglo of acuerdonan pasobra bo ta warda e proceso aki di Informado bay prome”, e dignatario a señala.
Aworaki e partidonan tin cu indica si nan ta dispuesto na traha cu MEP y ora nan scucha di nan parti, e trayecto aki por sigui, segun e Lider di MEP.
“Pero te na e momentonan aki, nos ta habri pa traha cu e partidonan politico cu a saca asiento, cu excepcion di Partido AVP”, Wever-Croes a expresa.
El a sigui splica pakico MEP lo no forma gobierno cu AVP, y esaki ta pasobra nan tin diferencianan fundamental den e vision di e partidonan.
“ Uno, ta e tema di corupcion. Nos ta un partido cu kier bringa corupcion y na e momentonan aki Partido AVP, lamentablemente, a tuma e direccion di ta braza, proteha y stimula corupcion, y esey ta algo cu nos no ta bay di acuerdo cune”, Evelyn Wever-Croes a subraya.
E otro punto ta cu AVP ta completamente contra e Landspakket, y MEP no ta kere cu ta cumbini aworaki, un gobierno cu ta bay pleita cu Hulanda, cu kier kita Ministerio Publico, Banco Central, etc. “Pero por lo demas ta keda tres partido cu ta RAIZ, MAS y Accion21, pero sinceramente e ultimo dianan aki nos di MEP tambe ta mirando e desaroyonan y nos ta preocupa pa mira kico ta pasando den e partidonan Accion21 y MAS”, e lider di MEP a acentua.
