Otmar Oduber secretario general di PPA:
ORANJESTAD (AAN): Secretario general di PPA, Otmar Oduber, ta bisa cu e eleccion aki su focus no lo ta si e partido ta grandi of chikito, si ta trata di un politico nobo of no. E eleccion aki pueblo lo mira si e propuestanan cu tin ta serio of no, ken a traha y a prepara e propuestanan aki.
“Ora bo priminti nan kier sa con bo ta bay cumpli, pesey PPA ta bisa cu nos tin un promesa pa e pensionadonan, nos tin un promesa pa salubridad y esaki pasobra nos sa for di unda nos ta bay saca e placa. Nos ta bay reduci gastonan di gobierno cu 140 miyon”.
Durante periodo di Otmar Oduber como Minister di Infrastructura, el duna casi 1900 tereno na hendenan cu tabata warda durante hopi aña, hasta 35 aña pa haya esaki y asina por logra construi nan hogar. Awendia hopi di nan, ora Otmar topanan riba caya, nan ta bin brase y gradici’e. Mayoria di biaha e no sa ken nan ta ya e tempo ey tabata pone alrededor di 400 pa 500 persona den un sala cu a pasa e proceso y cumpli. Esaki tabata worde haci sin importa ken e persona ta ni ki color e por ta.
Comentando riba e reduccion di gastonan di gobierno cu 140 miyon, Otmar ta bisa cu tin alrededor di 30 edificio di gobierno cu por worde bendi y gana placa cu nan, tambe tin un cantidad di departamento cu ta obsoleto y cu no tin motibo di existencia.Esaki no kiermen cu ta bay kita of manda ambtenaarnan cas, pero si mester tin e cohon di bisa pueblo cu e departamento ey ta costando tanto miyon pa aña y no ta produci nada.
“Nos a haci un calculacion, nos a haci un estudio, nos ta bay reduci gastonan, nos lo bin cu un reforma fiscal pa bay den direccion di un BTW y eseynan ta bay ta ingredientenan suficiente pa nos por duna nos grandinan, pa nos por inverti den nos enseñansa y pa nos por percura pa salubridad di henter nos pueblo”, Otmar Oduber a declara.
