ORANJESTAD (AAN): Aunke Conseho di Supervision di Stichting Sportsubsidie Aruba (SSA) mes ya caba riba Diaranson 24 di September a entrega keho oficial na Landsrecherche di loke a socede,
ata Diahuebs mainta 25 di September e Lider di fraccion di MAS parlamentario Marisol Tromp tambe a entrega na Ministerio Publico pruebanan cu el a ricibi di malversacion den Fundacion SSA di Gobierno.
Hopi biaha hende ta tende rumor y ta papia riba caya pero e parlamentario a ricibi pruebanan preto riba blanco y e ta compronde e consternacion cu tin riba e caso aki paso ta trata di berdad over di mal uzo di funcion di e director di Stichting SSA, pero ta wak tambe cu valsheid in geschrifte ta tuma lugar. Hopi biaha bo ta core den caya y ta wak hobennan para riba caya ta pidi placa cu bleki den man ta sacudi paso nan mester di placa pa por haci nan deporte y bay afo.
Placa di subsidio no ta yega nan destino: Parlamentario Marisol Tromp a splica cu loke el a entrega ta entre otro documentonan cu prueba cu tin peticionarionan cu ta haci deporte of ta di cierto organizacionnan cu ta inclui hobennan, y nan ta haci peticion pa worde susbidia, por ehempel, pa bay den exterior y e minister responsabel pa e cartera aki Endy Croes ta haya e petishon aki y aunke e peticion ta pa un fundacion, e minister ta aproba cierto sumanan y bo ta mira aki cu e placa no a yega su destino.
Ora hendenan a tuma nota di esaki bo por wak cu e invoicenan ta falso. Ora el a wak e documentonan cu el a ricibi, por mira cu e placanan no ta bay pa e fundacion of hobennan sino ta un invoice falso. Enbes cu e placa bay pa e compania, hoben of organizacion, e placa no ta yega nunca cerca e organizacion of muchanan.
Invoicenan ta worde falsifica: Al contrario, e invoicenan ta falso y ora di controla bo ta mira cu tin reisburo’s involvi y unda asta documentonan di nan a worde falsifica. Kiermeen e documento ta aparenta despues cu el a bay pa e director mes y su famia y otro personanan cu nan nomber ta riba dje y cu por ehempel a biaha cu e suma aki.
Esaki ta un ehempel chikito pa bo compronde cu ta abuso y ladronicia di placa cu ta destina pa un meta ta worde mal uza pa un otro meta y no djis un of dos biaha sino den un forma structural. E ta mane un modus operandi, un manera di trata cu placa di fondonan cu tin un destinacion y cu no ta bay pa e destinacion aki. Ora bo wak e papelnan ta parse mane cu e ta bay e destinacion aki, pero ora abo wak bon, e no a yega nunca e meta cual ta e hoben, e mucha, e vereniging di sport. E placa nunca a yega su destinacion.
Modus Operandi: “Aki tin hopi forma cu el a worde haci y loke mi a haya den mi poder, esey mi a entrega y ta un bunch basta grandi di tur e pruebanan”, asina parlamentario Marisol Tromp ta trece dilanti. E parlamentario di MAS ta haya hopi lamentable cu un gobierno cu ta papia di integridad, no ta prome bes cu ta wak e tipo di modus operandus aki y vooral cu e minister aki ya a hay’e envolvi den un caso similar antes. Awor aki por mira cu esaki ta sosode atrobe y laga husticia haci su trabao.
Prome Minister no ta entrega keho: Loke si parlamentario Marisol Tromp por bisa ta cu e gobierno aki y muy en particular prome minister Evelyn Wever-Croes na varios occasion ora e a haya sa tipo di casonan cu ta hole machtsmisbruik y cu ta hole cu a abusa di fondo manera por ehempel na Aruba Huis, e no a entrega keho.
E tampoco a entega keho siendo cu si bo tin prueba y ley ta bisa duidelijk ‘eenieder di kennis draagt van strafbare feiten’. Dus cualkier persona den comunidad cu sa y a haya sa cu tin prueba di cosnan penal, ta su deber pa entrega keho. Awe por ta parlamentario Marisol Tromp pero mañan por ta otro hende cu ta haya sa di esaki y por bin entrega keho na Ministerio Publico. Un aangifte bo ta bin haci.
