Parlamentario Jennifer Arends-Reyes:
ORANJESTAD (AAN) Parlamentario Jennifer Arends-Reyes a reacciona riba Parlamentario Vrolijk di MEP.
“Recientemente, Parlamentario Edgard Vrolijk a skirbi un articulo cu solamente ta sirbi pa e mes sinti great. E ta papia di ‘brevet van onvermogen’ ta parce cu ta cos cu nunca otro hende a duna sr. Vrolijk mocion di desconfianza of bah’e como presidente di Parlamento. E no por of no ta cumbini’e compronde cu Aruba aworaki tin mester di tur politico pa yuda Aruba pa enfrenta e retonan.”
“Vrolijk ta purba di bay back den tempo pa cuestiona decisionnan crucial pa Pais Aruba. E realidad ta cu Aruba a yega di enfrenta un situacion hopi serio diez aña pasa: casi 200 miyon mester pone un banda pa scapa e fondo di pensioen y pa garantisa pago di pensionadonan. E situacion aki a pone un presion grandi riba nos presupuesto y debe nacional, pero tabata necesario. Aruba ta un pais cu un grupo grandi di persona 60 plus (vergrijzing), y pa proteha nan futuro, mester a tuma decisionan cu no tabata popular.
Mescos ta conta pa infrastructura. Nos careteranan y hopi proyecto cu tabata den lachi pa mas di 40 aña a yega punto di urgencia door di e crecemento di nos poblacion. Aruba mester a inverti den infrastructura pa sigura un desaroyo sostenibel. Na mesun momento, e debe nacional mester keda den balans y tin un marco financiero saludabel pa por resisti un shock externo si un situacion inespera presenta. Y asina tambe Hulanda a introduci CAft y LAft un ley local di cuadro di supervision cu por a caba si pandemia no a presenta.
Parlamentario Jennifer Arends-Reyes: “Awe tin esunnan cu kier hunga wega politico cu e emocion y yama Gabinete AVP/Futuro pa entreguista? Mientras cu ta e propio partido MEP a firma cu Hulanda pa prome biaha, na beneficio di Aruba, y considerando cu nos debe cu Hulanda ta astronomico di nan banda nan ta exigi un cuadro financiero y plan pa paga y alavez baha nos debe nacional cu nos por carga.
Mas aleu, e parlamentario ta indica cu “e concepto di un HOFA apenas a ser publica y lo cana su proceso. Con oposicion por ta contra un concepto cu ainda no a worde publica oficialmente pa wak kico ta den dje?”
Segun e schema oficial di Reino, e proceso ta pasa via Rijksministerraad. Hulanda probablemente no lo acepta si Aruba presenta un version unilateral prome cu Hulanda mes ta publica, mirando cu ta trata di un acuerdo bilateral pa eventualmente yega na un Rijkswet.
Na e momentonan aki Aruba NO tin un Rijkswet pa cubri refinanciamentonan di debenan. Aruba tin e opcion pa refinancia su debe na un interes mas abou den HOFA y cu un clausula di salida despues di 3 aña si cumpli cu normanan.
Na final di dia, e rol di Parlamento ta decisivo. Corda cu ta danki na e parlamentario di coalicion MEP/RAIZ, por a yega te unda nos ta awe. Parlamento por ta critico, pero na final mester tuma un posicion sea ta sostene e gobierno of no.
Aruba tin supervision financiero y acuerdonan cu Hulanda pa yega na un finansa sostenibel. Proximamente, Aruba mes mester traha riba institui un Begrotingskamer pa reemplasa CAft.
Fraccion AVP ta sigui alerta y firme den defensa di interes nacional y un futuro financiero sostenibel pa pueblo Arubano.
Por ultimo, Parlamentario Arends-Reyes ta recorda su colega Edgard Vrolijk cu: “Si e Aruba di antes caminda Parlamento so tin 100% budgetrecht no ta existi mas, ta basa riba decisionnan incluyendo di MEP pa Aruba den temponan cu tabata necesario. Aruba tin supervision financiero y tin acuerdonan cu Hulanda pa yega na un finansa cu ta sostenibel y mester wak con nos mes tin cu institui un begrotingskamer di Aruba pa reemplasa CAft.
E Aruba di antes cu Parlamento so tin 100% budgetrecht y no tin control extra pa awo di biaha no ta den e menu cu MEP a laga atras sra Arends-Reyes ta termina bisando.
