‘E falta structural di contesta preguntanan di Parlamento ta falta di respet y inaceptabel’

Parlamentario Evelyn Wever-Croes:

ORANJESTAD (AAN): Lider di Fraccion di MEP Evelyn Wever-Croes a manda Diabierna un carta oficial na Gobernador di Aruba pa expresa su preocupacion grandi riba e falta structural di contesta di gobierno riba preguntanan di e Parlamento.

   Cifranan mas reciente di relato oficial di Parlamento ta mustra cu di e 2.275 preguntanan cu miembronan di Parlamento a haci, solamente 585 a worde contesta. Esaki ta nifica cu 75% (1.684 preguntanan) a keda sin worde contesta. Segun Wever-Croes, esaki ta un falta grandi di transparencia y un falta di respet cu gobierno mester mustra pa Parlamento y pa pueblo.

   “No ta solamente cifra,” segun Wever-Croes. “Ta trata di tema crucial di importancia pa comunidad, y cu Parlamento mester mas informacion pa por haci su trabao. E hecho cu preguntanan asina importante ta keda sin contesta ta inaceptabel.” Wever-Croes tambe a pone atencion riba e hecho cu peticionnan di fraccion di MEP pa convoca reunionnan tampoco no a worde atendi. E ta enfatisa cu esaki ta contra nos Constitucion y Reglamento di Ordo di Parlamento di Aruba.

   Cu su carta, Wever-Croes ta pidi Gobernador pa percura cu gobierno cumpli cu su obligacion constitucional di informa Parlamento. “Solamente cu transparencia y respet pa Parlamento nos por restaura e confianza di pueblo den nos democracia y nos estado di derecho,” e a conclui.