Parlamentario Edgard Vrolijk:
ORANJESTAD (AAN): Parlamentario Edgard Vrolijk di MEP a comenta den fin di siman, cu e mes no sa atende mucho mas cu kico coalicion ta trece dilanti, paso bo ta perde tempo y sigur no ta contribui en absoluto na conocemento.
Pero pa e topico di rijkswet, e ta reacciona riba un articulo di sra Jennifer Arends-Reyes cu a lag’e sorprendi pa su escogencia di palabranan, pero sigur su amor pa e pais aki y principalmente pa e capacidad di nos hendenan pa tuma decision y atende cu retonan financiero. Vrolijk a bisa cu aki e ta atende cu dos ponencianan treci dilanti cu nos ta bao control financiero caba y cu e ley di Reino (rijkswet) ta un continuacion di un realidad cu ya ta existi caba y sigur cu e palabra autonomia no ta simbolo di Libertad pero ta uza autonomia como simbolo di miedo.
E ley di Reino ta continuacion di supervision cu ta existi caba, mester di e ley aki actualmente
Tin di atende cu sra Jennifer Arends-Reyes riba esaki y tin di cord’e cu e ta parti di e historia scur di Aruba. Como Parlamentario di fraccion di AVP di 2013-2017 su persona no tabatin e pudor di para pa pais Aruba y su persona mester a percura pa bon maneho financiero, pero a opta pa ta un stempelparlement y tabata sostene presupuestonan cu deficitnan cu ta core riba 400 miyon Florin sin un hustificacion, ministernan cu ta pasa nan presupuesto cu 1000% y tabata vota ‘voor’ wowo cera. Esakinan a causa cu bao nanishi di sra Jennifer Arends-Reyes nos como pais a haya na 2014 un KB paso Hulanda a cansa di wak un Parlamento den winterslaap.
E KB su base ta articulo 43 inciso 2 di Statuto unda pa mal maneho financiero Hulanda mester a actua y kita esaki temporalmente di Aruba y tambe a kita e rol di Parlamento cu mester sigui desde 2025 locual CAft dicta. Y pa recorda cu politica ta cruel cu ta sra Jennifer Arends-Reyes mester a pasa e ley di LAft na 2015 pa por a incorpora un organo Hulandes pa maneha finansas di pais Aruba. E tempo ey Hulanda por a institui un Ley di Reino pero no a haci’e y cu motibo valido cu awo no tin.
Y awe e mesun Parlamentario aki sra Jennifer Arends–Reyes, cu ta parti di e historia scur di endeudamento di Aruba, parti di e KB ricibi y ta e persona cu a institui CAft por medio di un ley local conoci como LAft, kier bin papia di continuidad di supervision. Y e pregunta ta: nos situacion financiero ta mescos cu na 2014 ora a haya KB pa mal maneho financiero?
Maneho financiero: Na 2014 ora Hulanda duna Gabinete Mike Eman II un KB pa mal maneho financiero, nos pais den 5 aña a redobla su debe nacional, tabata riba caminda pa tin 93% di nos GDP na debe, sin conta e proyectonan PPP cu tabata off balance y sin placa aloca den presupuesto pa nan ser paga. Pues un situacion penoso unda nos presupuestonan ta core cu deficitnan entre 300 y 444 miyon pa aña cu a causa un daño enorme creando debenan desproporcional y sin control. Na e momentonan aki ora bo habri e ley nobo HOFA di Reino di Gabinete AVP-Futuro bo ta lesa di protocol 2013, 2015, 2018 cu tur a caduca y un Bestuurlijk Akkoord cu lo bay traha pa wak si por yega na un ley nobo di Reino pa por tin miho interes, pero si no logra lo mester paga interes mas halto a base di un mocion di Hulanda den Tweede Kamer.
Esaki ta pa pueblo compronde cu sin ley di Reino mes Tweede Kamer a haci abuso cu Aruba di impone un sancion di 6,9% di interes, sin cu Tweede Kamer mester por influencia e Gobierno di Reino pero mane nos tur sa cu ora papia di Gobierno di Reino bo mester djis conclui e Gobierno Hulandes. Ora lesa e ley nobo aki di Reino HOFA di Gabinete AVP- FUTURO ni un caminda ta papia di e situacion actual di Aruba na 2025 pero ta bay bek den tempo di sr Mike Eman y Gabinete Mike Eman I y II y ta haci manera ta esey ta e base pakico mester bin c’un ley di Reino, mientras nos como Aruba su debe na 2025 a yega 70% di nos GDP, nos a logra haal-in nos jaarrekeningnan, nos tin bon ratings di instancianan internacional cu nos no tabatin, nos tin surplus structural di mas cu 500 miyon florin, pues Aruba ta hibando un bon maneho financiero compara cu na 2014 cu a haya KB. Pues no tin ningun motibo valido pa hustifica pa eleva e supervision financiero na nivel di Reino y sigur unda cu Parlamento di Aruba ta bira obsoleto y AVP y FUTURO ta opta pa hinca nos supervision financiero completo den man di Gobierno di Reino y Parlamento Hulandes unda cu 150 hende cu no conoce nos mes y na 9.000 kilometer leu di nos lo mester dicidi riba nos sin conoce nos cultura ni nos necesidadnan.
Kico ta autonomia pa sra Jennifer Arends-Reyes: Pa sra Jennifer Arends-Reyes autonomia ta simbolo di miedo. Mi ta lamenta e expresion entreguista aki y ta bon pa sra Jennifer Arends-Reyes bay den historia y sigur papia cu nos grandinan cu a lucha pa nos Status Aparte y cu danki na lucha di nos grandinan cu nos por a crece como pais. Prome cu 1986 tur nos placa di impuesto tabata bay Corsou y nan tabata dicidi pa nos kico por haya bek di e placa aki y sigur cua peticion por ser honra. Cu sra Jennifer Arends -Reyes no a percura pa controla nos finansas y a permiti pa malgasta e fondonan di pueblo, no ta dun’e e autoridad di simbolisa autonomia como miedo, pero autonomia ta libertad di un pueblo pa scoge locual ta miho pa su pais.
“Mi ta coy e mesun ehempel cu sra Jennifer Arends-Reyes a uza den su comunicado: si nos como pais dicidi di usa e 1% di surplus pa inversion, kizas den un prison nobo of un scol nobo, Hulanda ta duna nos KB y esaki ta netamente e libertad cu e pueblo aki a busca na 1986 cu nos por tuma nos decision na bienestar di nos pais. Unda cu si nos mester un prison of scol nobo, nos por haci e inversion aki sin mester bay puntra/haya aprobacion. Cu e ley nobo di Reino cu AVP y Futuro a entrega tras di lomba di pueblo, nos ta bay bek pio cu prome cu 1986, pa motibo cu awo nos tin di haci peticion na Gobierno di Reino (lesa Hulanda) y unda cu un instancia CAft cu ta duna conseho na Gobierno Hulandes mester dicidi si nos por desvia di e normanan si of no. Si no ta di acuerdo bo wel di lubida y nan decision ta bay pa Tweede Kamer y unda nos Parlamento no tin nada di bisa y mester djis ehecuta locual cu Gobierno di Reino (lesa: Hulanda) y CAft y Tweede Kamer dicidi pa nos.
Ta con sra Jennifer Arends -Reyes ta kere nos a haya e sancion di 6,9%? Ta di Parlamento di Hulanda a bin cu e sancion aki y Gobierno di Reino cu ta alabes tambe Gobierno di Hulanda Mirando e verhouding den esaki y unda nos como pais den e conseho di Reino no tabatin ningun influencia riba un sancion imponi door di Parlamento di Hulanda. Si sra. Jennifer Arends -Reyes haci uso di su derecho di amienda pa acomoda fondo pa drecha of placa pa maestronan haya aumento di salario, e amienda aki mester bay Gobierno di Reino prome cu ta mand’e pa CAft y esaki ta duna conseho. Si nan bisa no... dobla warda . Pues sra. Jennifer Arends-Reyes como parlamentario mes ta perde su derecho di amienda y asina nos Parlamento una bes cu e ley di Reino aki pasa ta bira e organo di ehecucion di CAft y Gobierno di Reino.
Y e postura di sra Jennifer Arends-Reyes ta gewoon un mentalidad di entreguista y kier tapa y hustifica su mal trabao como parlamentario di 2013-2017 unda cu a permiti deficit desproporcional den nos presupuestonan cu a conduci na un KB na 2014 y implementacion di supervision financiero riba Aruba na 2015.
Si e no por haci su trabao di controla su gobierno y pesey kier un ley di Reino di supervision, djis sali pafo y bisa of tuma bo retiro paso bo persona no tin e corahe pa para bo mesun Gobierno y ta honesto cu pueblo di sali bisa cu ley di Reino ta bon pa controla Mike Eman y Futuro pero en cambio ta keda purba manipula mente cu ta miedo. Aruba actualmente tin bon maneho financiero laga atras y unda pais Aruba tin surplusnan di 500 miyon of mas, 4 aña consecutivo presupuesto entrega na tempo, jaarrekeningnan te 2023 entrega pa haal-in e retraso.
Unico tarea cu mester a haci ta wak con ta adapta e LAft y ancra normanan nobo y baha e interes di e debe di mas chikito di pais Aruba pa yuda den un pandemia den un contract conforme tur debe di nos pais desde Status Aparte, pero un bes mas ta scoge e caminda facil di entrega pa falta di capacidad propio di control bo mesun gobierno y ta pidi Hulanda y 150 parlamentario Hulandes pa haci e trabao pa e parlamentarionan di AVP y Futuro. Esaki ta yama ‘Brevet van Onvermogen’.
