Durante encuentro ‘Ban Topa’ na Paradera a resalta e union entre pueblo y Partido MEP

ORANJESTAD (AAN): Diamars anochi, Partido MEP a topa cu un publico grandi y entusiasma, pero tambe critico riba pregunta y comentarionan na Piedra Plat Entertainment Center.

Por a tuma nota di un cantidad grandi di ciudadanonan di districto di Paradera pero tambe di tur otro parti di nos isla. Despues di e programa bon poni den otro, ciudadanonan por a trece nan preocupacionnan apart cu Lider di MEP y of cu e otro candidatonan presente.

            ‘Ban Topa’, ta un programa informativo den diferente bario cu e meta pa informa, delibera y contesta diferente pregunta di comunidad riba diferente topico cu ta regarda nan bario y nos pais Aruba. Den celebracion henter aña di 51 aña di Partido Movimiento Electoral di Pueblo (MEP), a cuminsa bek cu encuentronan den tur districto.

            Lider di MEP, Evelyn Wever-Croes, candidato Darlaine Erasmus y candidato Michella Steenvoorde tawata esnan encarga pa trece informacionnan riba e topiconan: Recuperacion y Retonan. Innovacion y Enseñansa y Plan di mayor y KIES na scolnan.

            Den nomber di Partido MEP, Lider di MEP y Prome Minister di nos pais, Evelyn Wever-Croes ta gradici tur esnan, organisadornan, sostenedornan y demas participantenan, cu a haci e encuentro aki na Paradera posibel y exitoso.

            Manera tabata e caso den e encuentronan di ‘Ban Topa’ anterior, e union entre candidatonan di Partido MEP a resalta pero sigur tambe a resalta e union di ciudadanonan cu Partido MEP. MEP y pueblo ta un ekipo fuerte. Union ta e forsa di Partido MEP”, Lider di MEP Evelyn Wever-Croes a enfatisa.