ORANJESTAD (AAN): Miembro di Parlamento, señora Aquannette A. Gunn, ta haci un yamada urgente na Minister di Labor, Energia y Integracion, sr. Glenbert Croes, pa contesta preguntanan critico tocante su maneho di energia pa Aruba.
E preguntanan, cu a keda dirigi na Minister Croes den forma di carta, ta busca claridad riba varios asunto clave, incluyendo e status di Environmental Studies di Eagle LNG, e trabaonan di construccion pendiente, y e implicacionnan financiero di e MOU recien firma cu Acciona Energia.
Señora Gunn ta pidi contesta por escrito y ta spera cu e Minister lo cumpli cu su debernan democratico y transparente pa informa tanto Parlamento como e pueblo di Aruba.
Preguntanan Clave cu el a haci, ta encuanto Eagle LNG: E kier sa si a finalisa e Environmental Studies? Y si e contesta ta si, por comparti e estudio cu Parlamento?
Encuanto e Construccion Pendiente: Kico ta e motibo cu e trabaonan di construccion pa e facilidadnan y tuberia no a inicia ainda?
Riba tarifa di Coriente: Con e retraso den trabaonan ta afecta e tarifa di coriente pa e pueblo?
Encuanto MOU cu Acciona Energia: Ki dia e MOU a keda firma berdaderamente y kico ta e implicacionnan financiero pa Pais Aruba?
Señora Gunn ta subraya e importancia di transparencia y ta spera cu e Minister ta consciente di su postura di keda sin contesta ta crea un ambiente di desconfianza y incertidumbre den e comunidad.
