Mensahe di Eduard Pieters riba Dia di Maestronan
ORANJESTAD (AAN): Eduard Pieters di Partido PPA, a indica cu cada 5 di October, nos ta recorda y celebra Dia Internacional di Maestro. Ta un momento pa honra e pilar fundamental di sociedad: esnan cu ta forma e generacion di mañan. Pero mientras mundo ta yama maestro “arkitecto di futuro”, na Aruba e realidad ta hopi mas duro y doloroso.
Ta maestro awendia na Aruba ta hopi mas cu un profesion. E ta un vocacion cu ta carga un peso social, emocional y financiero cu ta bira cada aña mas pisa. Nan ta guia, consehero, psicologo y hopi biaha, un di dos mama of tata pa e mucha of hoben cu ta biba den circunstancia dificil. Sinembargo, nan mes como hende ta lucha pa cubri gasto basico, mantene famia y sobrebibi den un sistema cu pa hopi aña ta laga nan sin un structura salarial husto y ta reconoce nan desaroyo como profesional
Den klas, maestro ta enfrenta mucha of hoben cu ta cargando problema di cas, pobresa, violencia emocional y fisico, negligencia y distraccion constante di un mundo digital, un sistema di organisacion rigido sin flexibilidad, curiculo anticua cu no ta sirbi e necesidad di forma e hende den siglo 21 pa por funciona debidamente den sociedad. E rol di maestro ta hopi mas extenso, cu hopi ta asumi. Un maestro ta saca e mucha y hoben for di su tristesa y soledad; motiva e studiante cu a keda sin speransa y recorda tur hende, cu tur mucha y hoben por, tin balor y futuro. Ademas, debi na e complehidad aki no tur ora e maestro ta haya e posibilidad di, ni motivacion pa desaroya competencianan necesario pa medio di profesionalizacion pa enfrenta tur e retonan ya describi.
Nos mester realisa, cu sin maestro bon ekipa, motiva y balora pa su pais, e tambe ta sufri den silencio. Un maestro cu ta constantemente den un estado di sobrevivenvia, cansa of no balora, simplemente no por duna su 100%. Y asina, Aruba ta perde su recurso mas importante: calidad di enseñansa pa nos yiu.
A yega ora pa nos pais recorda, cu ta un maestro no ta un gasto, sino un inversion di oro sumamente importante pa nos futuro. Si nos ke un Aruba fuerte, resiliente, liber di corupcion, husto y prospero, nos mester trata maestro cu dignidad, duna nan e respet y motivacion pa medio di un7 restructuracion di salario integral cu un maneho solido di recurso humano, cu ta refleha crecemento y nan entrega na nos yiunan. No djis un mensahe di pabien yena di palabra bunita pa e dia di awe, pero cu accion y promesa finalmente cumpli y realisa.
Riba Dia Internacional di Maestro, mi mes como maestro ta honra tur maestro cu ta persevera a pesar di falta di reconocemento. Nan ta e heroe silencioso di Aruba. Pero mas cu un palabra di danki, nan merece accion. Pasobra sin respet pa maestro, nos como pais tambe ta fayando nos mesun muchanan y hobennan.
