ORANJESTAD (AAN) Parlamentario y Lider di Fraccion di MEP, señora Evelyn Wever-Croes,
a duna di conoce den entrevista cu DIARIO, cu den nomber di e 6.424 firmante di e accion di firma di rechazo na e Rijkswet HOFA, cu MEP a organiza, a manda tambe e participacion y e mensahe den e Internet Consultatie.
“Internet Consultatie ta loke Gobierno Hulandes a habri como posibilidad pa personanan duna nan opinion tocante un ley cu nan ta bay cambia of kier bin cu ne. Internet Consultatie a cera dia 28 di September y prome cu esey nos a logra di manda, den nomber di e 6.424 firmante, nan opinion pakico nan no ta di acuerdo cu e Rijkswet aki.
“Un biaha mas un danki di curazon na tur esnan cu a firma caba, y si abo no a firma ainda, ainda tin oportunidad. E Rijkswet aki no ta bon p’Aruba. E ley aki ta strangula nos pais, e ta sofoca nos pais, e ta bay frena nos desaroyo, y esey no ta algo cu nos kier. Nos kier un Aruba liber, un Aruba cu ta bay den desaroyo y crea oportunidad pa bo, pa bo famia, pa nos pais”, Parlamentario Wever-Croes a enfatiza.
