Parlamentario Hendrik Tevreden:
ORANJESTAD (AAN) – Den conferencia di prensa di Fraccion di Partido Movimento Electoral di Pueblo (MEP), Parlamentario Hendrik Tevreden a hiba palabra, pa sigui informa comunidad riba kico tur e Rijkswet HOFA ta nifica, y kico su efecto lo ta pa Aruba su Finanzanan Publico.
Tevreden a elabora riba e tema di Rijkswet Financiero (HOFA), y hopi hende ta puntrando si esaki ta e instrumento cu Aruba mester pa mehora su maneho publico, pasobra e Rijkswet solamente ta trata riba e maneho publico.
E parlamentario ta indica cu e ta lesa den prensa y scucha den varios media social diferente comentario y opinion cu, eigenlijk, no ta bay riba e Rijkswet financiero; mi ta wak e comentarionan ta bay over di politiconan. “Pero e Rijkswet HOFA tin di haber cu supervision financiero, cu por cierto desde 2015 pa medio di e Ley di LAft Aruba tin caba un supervision financiero. E gobierno di Aruba e tempo ey, y Gobierno di Hulanda, a yega na un palabracion, na unda cu den un ley local, un Landsverordening, Parlamento di Aruba ta determina e palabracionnan y e normanan financiero nobo, cu Aruba y Hulanda a yega na acuerdo na dje”, Hendrik Tevreden a señala.
El a agrega cu locual ta trata e Ley di Reino, esta HOFA, ta un ley riba un categoria mucho mas halto, un herarkia hopi mas halto. “Esey practicamente ta nifica cu Den Haag kier cambia e sistema existente unda cu nos ta dicidi kico y con, pa nan dicidi kico y con pa nos”, Parlamentario Tevreden a recalca.
E parlamentario a sigui splica cu un Rijkswet ta un ley di Reino cu ta normal pa regla cosnan di Reino Hulandes, manera loke ta nos nacionalidad Hulandes, pa medio di un paspoort.
“Esaki ta den un rijkswet unda cu ta bisa cu paisnan di Corsou, Sint Maarten, Aruba, Hulanda ta yega na un acuerdo unda cu nos ta carga nacionalidad Hulandes, y asina den nos paspoort tambe ta bisa cu nos ta representa e Reino Hulandes, of ta carga e Nacionalidad Hulandes. Pero pa bo regla bo finanzas interno di Pais Aruba, siendo cu nos ta autonomo desde 1986, y ta un di e razonnan principal pakico nos a sali for di bao e Constelacion di Antiyas, y haya nos Status Aparte, ta pa via cu nos tabata kier a maneha nos finanzas interno nos mes. Anto, mi ta kere cu e Ley di Reino a bay demasiado leu pa duna algo di bisa riba nos maneho financiero na Den Haag. Profesornan di Ley ta yama esaki, den terminologianan cu nan ta uza ‘abuso di instrumento di ley’. Y mas ainda un ley di Reino ta kita e legitimidad, e derecho democratico di Parlamento di Aruba. Esey kiermen cu ta Hulandesnan den Tweede Kamer, cu ta wordo scogi pa e comunidad Hulandes ora nan bay eleccion, ta nan ta vota riba e ley, y ministernan Hulandes ta firma e ley, y ta nan tin cu dicidi of, deshaci, di kico ta pasa cu e finanzas publico di Aruba” Parlamentario Tevreden a señala.
