Parlamentario ing. Carlos Bermudez:
ORANJESTAD (AAN): Durante e simannan tra’i lomba a tuma nota cu oposicion a pone firmemente como meta pa crea panico den pueblo, pa mal informa nos ciudadanonan, pa troce e berdad y tambe pidi pueblo pa firma contra un proceso cu precisamente e gabinete anterior a cuminsa.
Pa defende pueblo di e trampa político aki y para pa transparencia y integridad den gobernacion, Parlamentario Bermudez kier a splica pueblo na un manera simpel con pais Aruba a yega na e Rijkswet.
Scenario 1. Paga debe na 6.9% di interes.
Señora G.W.C a haci un prestamo na un banco comercial (Banco H) pa compra di un cas (C) y tambe tin un otro prestamo cu un un institucion financiero (U).
Banco H a duna e prestamo na Señora G.WC na 6.9% di interes pa 20 aña. Condicion: basta cu señora G.W.C cumpli cu e contract L y cu Departamento C lo controla e situacion financiero di Señora G.W.C pa cu e pago. Nada mas.
Scenario 2. Paga debe na 3.5% di interes.
Banco H a propone cu si Señora G.W.C ta desea Banco H lo refinancia e debe cu tin na e institucion financiero (U) cu un porcentahe di Banco H y lo por baha e porcentahe di e prestamo di cas di 6.9% na 3.5%. Pa esaki Señora G.W.C mester firma documento B cual lo tin como meta pa reemplasa e contract L cu contract R.
Señora G.W.C a scoge opcion 2 y a firma e documento B.
Awor den terminologianan - E caminda di Rijkswet. Señora G.W.C (Gabinete Wever-Croes), NO a scoge pa scenario 1 caminda cu Banco H (Hulanda) a dun’e e opcion pa paga e prestamo di e Cas (COVID) na 6.9% y punto. Solamente mester tene cuenta cu e contract L (LAft) y e control di e departamento C (CAft). Gabinete Wever-Croes a nenga e opcion aki. A scoge opcion 2 y a firma e documento B (Bestuurlijk akkoord).
Gabinete Wever-Croes a dicidi di firma e documento B (Bestuurlijk akkoord) y asina a habri e caminda pa na final reemplasa Contract L (LAft) cu e contract R (Rijkswet) pa asina baha e porcentahe di e prestamo di cas (COVID) y pa refinancia e debe cu institucion financiero U (USA).
Sosten Conseho di Ministro: Parlamentario Bermudez kier pone enfasis riba e echo cu prome cu Evelyn Wever-Croes a firma e bestuurlijk akkoord dia 4 juni 2024, el a haya e SOSTEN di e ex-ministernan. Nan cu a duna sosten pa firma e bestuurlijk akkoord awor kier expresa cu nan ta contra. Awe kier haci drama, gaña muri wak kende ta bin entiero (haya firma) y pa purba na camufla e asunto y gaña e pueblo manera cu nunca nan a duna sosten pa cu e Rijkswet.
TUR e ex-ministernan di oposicion tabata PRO e Rijkswet. P’esey e bestuurlijk akkoord a keda firma dia 4 juni 2024 pa Gabinete Wever-Croes door di ex- Minister President Evelyn Wever-Croes.
Si bo tabata contra bo mester a para pa esey, pero TUR a dobla y duna nan sosten.
E grito: “Economia ta creciendo y NO na Rijkswet”
Un cos cu Gabinete Wever-Croes a gaba cu ne, ta e SURPLUS. Awe, den oposicion nan kier grita cu: “Tin surplus! Economia ta creciendo. No mester Rijkswet. No mester entrega autonomia”
Na 2023/2024 tambe tabatin surplus; tambe ecomonia tabata bon. Sinembargo tog Gabinete Wever-Croes a firma e bestuurlijk akkoord mirando e beneficio di un interes mas abou. Na 2024 nan por a keda sin firma y paga e debe na 6.9%, pero a scoge pa e Rijkswet; un Rijkswet cu manera nan mes ta bisa: nan a negocia 90%.
Si bo ta contra un Rijkswet, di unda ta sali cu tog bo ta bay negocia? Na 2024 mester a djis bisa Hulanda: “Bedankt, maar nee bedankt”. Pero nan no a haci esaki; nan a firma e bestuurlijk akkoord dia 4 juni 2024.
Awe oposicion kier hunga cu sentimento di pueblo; awe kier troce e verdad y awe kier haci como sifuera na 2024 nan tabata contra, mientras cu TUR e ministernan e tempo ey (2024) a duna nan sosten cual a conduci cu señora Wever-Croes a firma e bestuurlijk akkoord.
E mas tristo ta cu awe bo ta haya e parlamentarionan di oposicion cu a sostene e firmamento di e bestuurlijk akkoord na 2024 ta bin hunga rol cu nan ta contra. Nan ta of lo ta e salbadonan di patria.
Parlamentario Bermudez ta lamenta cu oposicion tin cu, baha na e nivel aki: Trata pueblo na e manera aki. Gaña pueblo, manipula pueblo y hunga cu sentimento di e pueblo.
Parlamentario Carlos Bermudez: “Pueblo di Aruba, NO laga nan gaña bo y no laga nan hunga cu bo sentimento. Bo merece worde informa debidamente y ta nos deber di haci esey.”
