Jurette Croes, PR di DVG ta splica:
ORANJESTAD (AAN) — Jurette Croes, PR di Departamento di Salud Publico (DVG), a duna di conoce cu desde Dialuna 15 di September awo, a introduci un servicio nobo pa tur persona cu tin AZV y cu tin cu aplica pa un certificado di salud of esnan cu mester di green card pa haci nan trabao den Horeca; na momento cu nan a caba di haci nan testnan, nan por haya nan certificado di salud den nan Health App, di manera digital.
Anteriormente, e persona mester a bay Departamento di Salud busca su certificado imprimi, pero desde awo, en principio, e persona cu tin su Health App, ta download riba dje, pasa den e proceso y por haya su certificado di salud di forma digital.
“No por hacie pa tur persona pasobra Health App ainda ta mara na e AZV Card. Esnan cu mester di un green card pa eherce nan funcion, nos ta aconseha nan pa nan cuminza cu e proceso di Google. Download e App y pasa atravez di e proceso. E ta un proceso un tiki largo si, door cu e tin basta sistema di seguridad debi cu ta datonan personal. Despues di diez dia cu bo a haci bo ultimo test, bo no mester bin akinan busca bo certificado, pero bo ta hay’e digitalmente riba bo Aruba Health App”, Jurette Croes a reitera.
El a agrega cu tin un sistema unda cu e persona mes por imprimi e App, y e ta mas facil ora cu e ta wordo controla door di e instancia concerni, e por saca su Aruba Health App, mustra nan esaki.
“E app tin diferente funcion, entre otro bo tin bo contacto cu bo docter di cas, bo por haci cita atravez di Aruba Health App, tambe bo por wak bo remedinan a traves di dje, e vacuna di covid-19 ainda ta disponibel den Aruba Health App. Departamento di Salud Publico ta bezig pa introduci mas servicio; dentro di poco esnan cu ta tuma vacunanan di Gele Koorts por bay wak riba Aruba Health tambe. Poco, poco nos ta ampliando nos servicionan via Aruba Health App”, Jurette Croes, Relacionista Publico di DVG a remarca.
