ORANJESTAD (AAN)— Gobierno a yama un conferencia di prensa como clausura di e dos dianan di Vacunathon, cu a tuma lugar diasabra 24 y diadomingo 25 di April awo,
na cuater diferente localidad.
Manera ta conoci esakinan tabata: Centro don Bosco na Noord, Centro Deportivo Betico Croes na Santa Cruz, Santa Teresita Center na San Nicolas, y ballroom di Ritz Carlton Hotel.
Prome Minister a hiba palabra, expresando lo siguiente:
“ Nos ta clausurando un Vacunathon hopi exitoso. Te cu 4’or nos a logra vacuna 7.001 persona den e fin di siman aki so. Nos ta sigui un ora mas pasobra nos ta mira cu mas hende ta yegando y nos lo atende nan y vacuna nan tambe”.
Cu a vacuna 7.001 persona durante e Vacunathon aki, ta un logro hopi grandi. Asina Premier Wever-Croes a bisa.
“Na Ritz Carlton a vacuna 2.312 persona, na Centro Deportivo Libertador Betico Croes a vacuna 2.232, na Club don Bosco 1.261, y na Teresita Center 1196”, e dignatario a duna di conoce.
Esaki ta haci cu e total di personanan vacuna na Aruba ta 53.113 cu ta 54% di e grupo di riesgo, y nos kier yega 85%. Kiermen, Aruba ta hopi bon riba caminda pa Logra, segun Prome Minister.
“Mi kier gradici di henter mi curazon tur esnan cu a haci di e Vacunathon aki un exito. Tur e 7.001 persona cu a vacuna y tur esnan cu ta yegando awo ainda, cu a deposita nan confianza y a bin e dos dianan aki pa e vacuna, sin cu nan mester a registra prome. Mi kier a gradici tambe tur esnan cu a traha na e cuater sitionan aki di vacunacion. Nos a mira profesionalnan den cuido, boluntarionan, nos a mira e sosten administrativo cu tabata tin pa registra tur hende, y tur esaki ta personanan cu a pone nan tempo disponible pa yuda nos y di curazon mi ta gradici bosonan enormemente den nomber di henter Gobierno di Aruba”, Prome Minister a expresa, agregando cu tambe e ta gradici den nomber di Minister di Salud Dangui Oduber, cu no por tabata presente den e ocasion aki.
E mandatario a reitera cu ainda no a yega na e meta di 85%, y e ta apela na tur ciudadano di 18 aña di edad bay ariba, pa registra pa vacuna. E mandatario a subraya cu ora yega na e meta di 85% di vacunacion por cuminza flexibiliza e medidanan y mira realmente, e progreso di Pais Aruba. Expresando un pabien y un danki, pa e logro di e Vacunathon aki, Premier Wever Croes a conclui.
