ORANJESTAD (AAN): Tur cos ta cla pa e prome Debate Politico 2021 cu ta tuma lugar Diahuebs awor pa 7:00 pm via TV.
E anochi lo start cu un antesala di 30 minuut, sigui pa e debate, y na final un 30 minuut di reflexion na final.
Martijn Balkestein ta forma parti di e Comision Organizador di Camara di Comercio. El a splica cu e seccion di Debate mes cu e 12 lidernan politico riba escenario, lo wordo dividi den 3 Tanda.
Tanda #1 lo consisti di preguntanan graba riba video, haci riba caya di ciudadanoan cu a haci pregunta. Tres politico (via lot) lo haya chens di contesta cada pregunta.
Tanda #2 lo consisti di 12 pregunta cu e Comision mes a formula, y cu ta toca tur clase di topico. Den otro articulo ya caba DIARIO a duna indicacion den ki direccion e preguntanan ey di Tanda #2 lo bay cu e lidernan.
Algo cu a hala atencion, ta e hecho cu Balkestein a splica cu lo bay tin un forma diferente cu cada politico lo contesta e preguntanan di Tanda #2.
Cada pregunta lo wordo contesta pa maximo 3 lider politico. E prome lider lo duna contesta. E di dos lider lo bay duna sea contesta of reaccion riba prome lider na palabra. E di tercer lider ta haya opcion pa sea duna un contesta, of reaccion riba e dos prome lidernan na palabra. Nan lo haya tanto tempo pa contesta cada uno.
Ora cu Tanda #3 cuminza, esaki ta momento cu preguntanan cu pueblo a haci lo bay wordo contesta. Preguntanan cu drenta via telefon of tambe social media, lo pasa door di un screening pa averigua nan relevancia, check si acaso nan a wordo haci caba, etc. A hasta pone un server apart na debate.kvk.aw pa publico por participa na esaki cu preguntanan. E 12 preguntanan relevante lo wordo pasa pa bay den aire, y cada pregunta ta bay haya 2 politico cu ta contesta nan cada biaha.
Segun Balkestein, tin mas forma pa ta interactivo cu e Debate, esta cu despues di cada Tanda tin chens di participa den un encuesta (‘poll’), y cada ciudadano cu ta sigui e Debate, lo por duna opinion riba cua lider nan ta kere cu segun nan opinion, lo bay duna mihor presentacion den un Gobierno, kende a duna contestanan na forma mas adecua, etc.
CONCLUSION:
Pues tur hende lo no djis mira debate, pero tambe formula nan ideanan a base di contestanan, y participa na un encuesta tambe.
Na final di e Debate, lo tin 30 minuut di recap di loke a caba di pasa, y lo bay tin algun orador profesional y analiticonan cu ta bay papia di loke a caba di socede durante e debate, na un forma di reflexion di e pregunta y contestanan. E no ta djis den man di KvK, pero tambe di profesionalnan cu lo analiza e contesta di e lidernan politico.
