Parlamentario Shailiny Tromp-Lee:
ORANJESTAD (AAN): Durante e ultimo reunion di IPKO (Interparlementair Koninkrijksoverleg) un tema hopi importante cu a keda trata ta: ‘vergrijzing’, es decir cu nos sociedad ta bira mas bieu. Esaki ta pasa den tur pais di Reino Hulandes: Hulanda, Aruba, Corsou y Sint Maarten.
Kico ta vergrijzing?
Vergrijzing ta e situacion caminda tin mas hende bieu den e sociedad. Na Hulanda esaki a pasa pasobra tin un bahada grandi den e cantidad di baby cu ta nace pa aña for di añanan 70. Hende ta biba mas largo tambe, cu ta contribui cu e grupo di hende grandi ta sigui crece. Na Aruba e panorama aki sigur ta similar, asta tin experto ta papia di ‘dubbele vergrijzing’ na Aruba.
Durante di IPKO a keda presenta na nos kico por pasa den futuro? E proyeccion ta mustra cu den e proximo añanan lo tin mas hende grandi y menos hende hoben. Esaki ta algo cu ta keda premira pa ful Reino. E situacion aki sigur ta bay sigui pone mas presion riba nos servicio publico manera cuido di salud, pensioen y trabou. Na Aruba ya caba nos ta sinti e impacto cual ta bay sigui aumenta. Pesey nos mester prepara nos mes miho como pais y ta dirigi pa continuamente ahusta maneho unda esaki ta necesario y ta cla pa reacciona riba desaroyonan calcula.
Na IPKO a trata tambe kico nos por haci?
Segun e discusion den IPKO, tin algun medidanan cu por yuda. Sigur ta na su lugar pa nos inverti mas den nos sistema di salud pa por atende cu un populacion cu ta birando mas bieu. Alabes mester cuminsa discuti e posibilidad pa duna nos hendenan grandi mas chens pa sigui traha si nan ta desea y percura pa e condicionnan laboral necesario pa haci esaki posibel. Mester percura pa elimina mas cu ta posibel e obstaculanan existente cu ta limita esaki. Otro sugerencia cu a keda presenta ta pa stimula cu nos Arubiano, Yiu di Korsou y San Marteño cu ta biba na afo, por bolbe pa yuda y traha na nan pais. Algo cu pa hopi aña e islanan ta purbando pero cu aparentemente tin factornan cu ta stroba e regreso di nos hendenan. Por imagina riba debe di estudio, bon trabou y cu un bon salario, bida familiar ya ancra na Hulanda etc. Pa finalisa mester subraya cu a keda presenta cu ta sumamente importante y esencial pa nos (sigui) colecta datonan necesario riba demografia pa nos por planifica miho nos futuro y ta miho prepara.
Conclusion
E fenomeno di ‘vergrijzing’ ta un reto pa nos tur, pero tambe un oportunidad. Si nos traha hunto, inverti na ora y busca solucion creativo, nos por sigura cu e sociedad di mañan ta keda fuerte y sostenibel. Tin hopi trabou pa haci ainda riba e tereno aki na Aruba, ta keda na Parlamento pa percura pa Gobierno atende ‘vergrijzing’ como un prioridad.
