Eduard Pieters di PPA:
ORANJESTAD (AAN): Despues di ricibi hopi yamada y mensahe di maestro cu ta expresa nan frustracion, Eduard Pieters, miembro activo di PPA, a dicidí pa elabora riba e historia doloroso di e lucha pa yega un na restructuracion salarial husto. Esaki ta un lucha cu tin mas di un decada ta andando, unda 5 gobierno a sinta y priminti, pero niun a cumpli.
Historia di salario di maestro: Despues di Status Aparte, den 1990 a implementa un Landsbesluit Bezoldiging Onderwijspersoneel (LBBO), pa ordena salario segun tipo di enseñansa y akte. “Pero realidad a bira desmotivante: maestro cu yega edad di 38 aña, por sigui traha, pero ta yega na su plafon, perspectiva y oportunidad di aumento di salario,” Eduard a elabora. Den un profesion cu ta exigi tanto entrega, motivacion y pasion, esaki sigur ta algo inaceptabel y inhusto.
Protesta 2008: “Ken no ta corda e protesta masal di 8 siman na 2008? Hopi maestro a pone trabao abou pa simannan largo y a manda un mensahe cla p’e gobierno di e tempo ey: basta cu wega politico cu nan futuro. Nan tabata cansa di promesa y a exigi accion y respet.
Promesa di 2009 cu no a cumpli: E eleccion di 2009 a yega, AVP a gana cu un mayoria absoluto y manera hopi maestro mes a expresa, nan tabata yena cu speranza, cu awor si nan lo haya restructuracion di salario. Sinembargo tur cos a keda na un promesa di eleccion. Ta te casi final di gobernacion, Minister Dowers a instala un ekipo y a hinca un “functiehuis” den otro. Functiehuis ta un plan pa rebalora e funcion y salario di maestro y simplifica e escala. Pero, finalmente nada concreto a keda ehecuta.
Na 2015, Minister Hooyboer a traha riba mesun tema y hasta a presenta un nota pa implementacion. Promesa di mantene BRA y implementa un Landsverordening Functiehuis Onderwijs tabata riba mesa. Pero na final di dia, e cambio real mes cu tanto tabata anhela, no a yega.
Gobernacion tras gobernacion: Segun Eduard Pieters: “Di 2009 te 2025, cinco gobierno a pasa: AVP, MEP–POR–RED, y atrobe MEP-RAIZ. Tur a instala comision, tur a saca nota, pero ningun a entrega resultado real y asina nos a yega 13 aña mas leu. Mientrastanto, maestro cu master of HBO no ta haya ningun reconocemento y tin alrededor di 600 maestro cu gobierno actual kier duna nan 3.49% di aumento so cu ta refleha falta di balor y respet cu nan merece”.
Finalmente Pieters a subraya cu ta nos maestronan ta e arkitecto di futuro di nos isla. Ta di lamenta cu 5 gobierno a pasa y ainda e maestronan ta wardando riba un promesa sin cumpli. Esaki ta considera como un falta di respet y Eduard ta kere cu e lucha mester sigui y cu e maestronan no mester rindi. “Ta ora pa trata nan cu dignidad y respet. Sin maestro motiva y hustamente trata, Aruba no tin futuro, Eduard a termina bisando.
