ORANJESTAD (AAN): "Mi lo sigui bringa pa piscadornan y na mes momento e proteccion di naturalesa.
Mi ta kere cu tur dos ta necesario y mester tin espacio pa bay hunto cu otro, man den man tambe. Esaki ta djis un ehempel di mi pensamento y forma di traha. Den gobierno, mescos cu den bida di cada persona, por bin conflicto ora tin dos interes, dos banda. E arte ta, pa yega na surpasa e conflicto y yega na solucion practico cu ta kibra e impasse", asina Parlamentario drs. Shailiny Tromp-Leed di MEP a expresa.
El a sigui bisa cu den e caso di e piscadonan, ban tuma e asunto di pisca cu harpun, ta un lucha cu nan a bin ta bringa p’e pa mas cu 20 aña. Si a bay den extremo anto ta dos banda lo keda grita den direccion contrario, sin tin satisfaccion pa ningun. Mi pensamento ta pa ban wak kico ta e puntonan di bista y compronde e diferencia y puntonan comun, pa asina wak si por yega na otro.
Den e caso aki, e piscadonan a bin pidi pa yuda nan. Nan peticion ta pa cambia e ley anticua y extremo y na su lugar trece regulacion. Nan ta teme cu nan ta wordo descrimina, no ta tene cuenta cu nan y cu e prohibicion extremo ta perhudica nan. Scuchando e otro banda a sali na cla cu nan ta teme free for all, cu lo por caba cu e recurso pero cu ta kere tambe den maneho y regulacion.
Treciendo tur e fraccionnan den parlamento hunto, como tambe tur grupo di interes, den dialogo, tin ora tenas, mi por a mira un solucion of solucionnan cristalisa. Un maneho temporal, e famoso gedoogbeleid pa duna un alivio rapido pa e piscado bou condicion estricto y un cambio den leynan pa solucion duradero a termino largo.
Ta facil grita pa un extremo of otro sin mas, pero di e forma ey nos como comunidad no lo progresa. Haci politikeria barata y polarisa y crea sensacionalismo ta facil pa esun cu kier, pero traha pa yega na solucion cu nos tur por progresa cune, esey ta rekeri seriedad, responsabilidad y bon boluntad. Asina mi ta traha y para pa bo. Asina, trahando hunto, ta yega na solucion y progreso berdadero.
Si abo tambe ta kere den traha hunto pa progreso di nos pais. Si abo e eleccion aki, buscando un candidato diferente, serio y capas di para pa asuntonan cu ta regarda bo, anto mi ta invita bo pa conecta cu mi y uni na mi. Ban hunto forma parti di e mehoracion.
