Partido MEP y PPA si a duna sosten oficial
- Siendo cu tur seis isla mester uni pa sostene e lucha
ORANJESTAD (AAN): Siman a habri cu Aruba ricibiendo bishita halto di diferente Partido den Parlamentonan di Islanan BES, esta Bonaire, St. Eustatius, y Saba.
E delegacion di e tres islanan aki ta busca sosten na islanan ruman Aruba, Curaçao, y St Maarten den cuadro di IPKO. Pasobra e lunanan aki islanan BES ta confrontando basta problema cu Hulanda, debi cu Den Haag kier cambia dos Rijkswet pa nan tambe, esta esun yama WOLBES y tambe esun yama FINBES, sin cu e islanan ta duna permiso pa tal.
E islanan BES ta esnan cu a tuma nota cu Den Haag a haci algun cambio di e deal traha na Maart 2024. E tempo aya, e islanan BES a trata di basha awa den biña di tur forma pa por a yega na acuerdo pa asina tur isla por carga e cambio, y Hulanda tambe. E proceso cu mester a sigui prome ta pa por implementa e areglonan cu a keda palabra den e acuerdo.
Manera DIARIO a trece dilanti caba, Benito Dirksz di lider di fraccion di UPP di Bonaire a bisa cu pa nan sorpresa, na Januari 2025 nan a cuminza ricibi e prome reaccion di e Staatssecretaris Zsolt Szabó, y nan a keda decepciona pa mira cu e no a bin trece nada positivo debi cu a cambia e decisionnan y e acuerdonan cu a traha.
Staatssecretaris Zsolt Szabó a bin haci cambio den e acuerdonan aki cu e islanan no a acorda den e palabracionnan.
E tres islanan BES, pues Bonaire, St. Eustatius y Saba a uni mesora y hasta a biaha pa Hulanda pa pone e situacion aki na nan atencion di Staatssecretaris, pero tambe na Eerste Kamer y Tweede Kamer. E Staatssecretaris a acepta pa por a reuni cu ne, pero no a acepta pa por drenta cu e consehero principal cu ta un profesor cu ta sostene y guia e islanan BES den henter e proceso.
E actuacion di Staatssecretaris a pone cu e islanan no a acepta su sistema y manera di impone y trata e islanan di e manera aki y esaki a trece un conflicto na momento cu no kier a acepta e consehero principal pa drenta den sala hunto cu e islanan. E situacion aki a pone cu no a reuni cu e Staatssecretaris , pero a laga un delegacion chikito unda cu un hende di cada isla a drenta pa entrega un documento unda cu ta bisa claramente cu e islanan BES kier bay bek mesa debi cu tin cambionan cu a wordo haci fuera di e acuerdonan cu a traha.
Sinembargo no a tende nada mas, pero awo cu e Staatssecretaris nobo a bin sinta a haye cu un situacion cu nan ta propone e cambionan cu nan ta bin cu awo mas ainda unda cu ta mishi cu e autodeterminacion di e islanan.
Pa Bonaire, e proceso cu ta tumando luga ta inaceptabel, e proceso ta bisa abase di articulo 209 di e Rijkswet WOLBES cu Hulanda mester bay mesa cu e tres islanan prome cu haci cambionan fundamental den WOLBES y esaki no a tuma luga.
Otro sorpresa nobo a drenta dia 2 di September 2025, a stipula consultatie pa e cambionan cu tin proponi den e WOLBES. Esaki a pone e hemchi bay over, y e islanan a mira cu Den Haag ta haciendo di mas, y no ta respetando nan.
Pa e islanan, nan ta sinti cu loke cu Hulanda ta haciendo ta di mas, no ta respeta e islanan, y kier pusha e islanan vap vap den algo cu nan no ta desea.
Pesey e politiconan di BES a dicidi pa viaha pa Aruba, Curaçao y St. Maarten pa pidi nan sosten den e caso aki, como cu Den Haag no ta dunando e islanan Bonaire, St. Eustatius, ni Saba oido.
Coalicion Aruba no kier: E islanan BES ta pidi e sosten aki na e gobierno y parlamento di e islanan debi cu pronto lo ta bay tin un reunion na IPKO cu lo tuma luga entre e tres paisnan hunto cu Hulanda. Debi cu e islanan BES no tin un voz den IPKO via di nan parlamento, nan ta pidiendo e tres islanan vocifera e islanan BES nan dolor y preocupacion di e manera cu Hulanda ta trata e islanan di Bonaire, St Eustarius y Saba.
E sosten ta wordo pidi na e parlamento di Aruba, Corsou y St Maarten pa bay IPKO cu ne y e tres parlamentonan hunto ta vocifera e peticion cu a ricibi pa sostene e islanan BES den nan lucha y preocupacion cu nan tin y di e mes un manera pa mustra Hulanda cu di e manera cu ta trata e islanan BES ta inaceptabel.
Nan ta haya cu tur isla Hulandes den Caribe tin di uni pa atende asuntonan cu Hulanda.
Benito Dirksz di Bonaire ta lamenta cu e reunion na Aruba no a tuma lugar habri pa publico, pa asina pueblo por a hay sa kico ta pasando den region.
Pa sorpresa, unico sosten oficial cu nan a ricibi ta di Partido MEP, y tambe Partido PPA. No a ricibi nada oficial di fraccion di AVP, y tampoco nada di fraccion di Futuro. Di e partidonan den coalicion a haya djis un sosten ‘verbal’, pero nada por escrito.
