Parlamentario Xiomara Maduro
*Esaki ta hopi infantil y berguensa pa Aruba
ORANJESTAD (AAN): Despues di a reuni cu representantenan di Islanan BES, Parlamentario Xiomara Maduro a duna un entrevista enfatisando cu como Arubiano y ruman di islanan den Reino, no por laga e islanan na caya manera AVP y FUTURO a haci.
E partidonan den gobierno a expresa di ta sostene e causa di Islanan BES pero lo no firma ningun documento simplemente pasobra ta MEP a traha e carta aki. Esaki segun Maduro, ta un manera hopi infantil y muestra di falta di experiencia di e parlamentarionan aki cu ta pone cara di Aruba na berguensa. E Parlamentario a remarca si AVP y FUTURO kier sostene e causa aki, nan mes tambe por a presenta nan carta. Pero nan no a haci esaki tampoco.
Parlamentario Maduro a cuestiona Minister Gerlien Croes kende ta e minister encarga cu relacionnan di Reino. Pa prome biaha na Aruba tin un minister cu ta encarga cu e ministerio aki. Por lo tanto, Fraccion di FUTURO den Parlamento ta representa tambe e ministerio aki. “Y awo cu a presenta un caso cu mester ser trata den Reino, na unda cu tur partner mester bisa algo, of brinda un sosten, awo Fraccion di FUTURO ta esun cu mi a mira cu tawata lucha cu AVP pa AVP no bay di acuerdo.
Pa AVP no duna e sosten riba papel. A straña mi hopi pa mira cu Fraccion di AVP tampoco kier un documento pa bisa cu Parlamento di Aruba ta sostene Boneiro. Representantenan di Islanan BES, esta Boneiro, Sint Eustatius, y Saba tawata na Aruba pa trece nan preocupacion y a bay bek man bashi”, Parlamentario Maduro a expresa.
E parlamentario a remarca cu mientras cu den fin di siman AVP y FUTURO a wapa den cayanan di Dakota pa celebra hunto Dia di Boneiro, dialuna a habri y a laga e representantenan di BES bay cas sin tin un sosten riba papel di Parlamento. Pero si nan a bisa cu nan lo trata e tema aki den e reunionnan di IPKO. “IPKO ta un otro organo na unda parlamentarionan di Reino ta papia cu otro.
Nos tin nos propio Parlamento na Aruba, nos tin nos propio responsabilidadnan, no solamente pa nos pueblo, pero tambe pa e pueblonan aki den Reino, y sigur den un causa di duna sosten. Nan a bin pidi sosten, y pa laga nan bay sin sosten, ta algo hopi mahos”, Parlamentario Xiomara Maduro a enfatisa.
