ORANJESTAD(AAN)—A base di e acuerdo cu Aruba a cera cu Reino Hulandes pa asistencia di Covid-19, un suma basta grandi lo bay restablece y fortifica e base legal di e pais.
Mientras esaki ta bira realidad, Aruba mester bolbe bira un pais di ley y pa esaki ta posibel, hustamente e personanan cu ta traha ley of ta pidi pueblo voto pa nan bira legislador, mester tene nan mes na ley.
Pa un ciudadano por vota, e mester tene su mes na cantidad di ley. Si e comete un un fout chikito, ora e vota, e voto ta wordo declara invalido.
Si un ciudadano compromete su voto, pues tuma placa of otro recompensa pa su voto, e ta bay prizon mescos cu lo ta e caso si e falsifica documentonan cu mester sigura cu ta su persona ta vota, cu e ta cumpli cu tur condicion pa vota y cu e ta honra ley.
Pues e votado ta mara na ley, loke no ta e caso cu e politiconan cu ta pidi voto di Pueblo.
Hustamente awe riba e punto aki nos ta bolbe pone lus y nos ta pidi Parlamento tene un reunion pa pone ley atrobe den su contexto y pa exigi asina, cu sikiera durante eleccion, e legislador y e politico cu ta pidi voto pa e bira legislador, wordo forsa pa cumpli cu ley.
Durante ultimo tempo, cu mas y mas hende kier pretende cu nan ta inteligencia y studia, por mira mas infraccion contra loke leynan ta bisa den Parlamento, caminda mester traha y cambia ley.
Ta increibel cu den Parlamento, mayoria cu a sostene gobierno Mike Eman, a trapa riba constitucion y tur ley basico di e pais pa por a pasa e Acuerdo di Citgo como secreto pa pueblo y pa oposicion.
Loke a pasa cu e Acuerdo di Citgo ta castigabel y DIARIO, a base di documentonan oficial a bisa Aruba cu realmente e Acuerdo di Citgo tabata ilegal pasobra gobierno no tabata tin poder pa firma e acuerdo aki sin cu Parlamento a trata e documento manera ley ta exigi.
Ora trapa riba ley ta papia di violacion di ley, cu ta crimen, cu ta manda hende prizon. Punto.
Kico Ley ta bisa di participacion na Parlamento? Pa participa na eleccion di Parlamento mester ta miembro di un partido. Esaki ta nifica cu ningun hende por posiciona su mes como miembro independiente di un partido den Parlamento, pasobra e persona como persona, no tin asiento.
Un persona cu haya suficiente voto preferencia pa un asiento, ainda por reclama un asiento na e partido cu cual el a participa y como miembro di e partido den Parlamento. E no por proclama su mes independiente pasobra ni su persona ni e partido cu e ta bisa cu e ta representa, a participa na eleccion di acuerdo cu ley.
Pues aki pregunta ta surgi si mester papia di fraude, di kiebra di ley pa participa den Parlamento segun tur experto cu DIARIO a consulta.
Daphne Lejuez no por ta den Parlamento actualmente pasobra e no ta parti di ningun partido den Parlamento. Punto! E no por papia tampoco den Parlamento pa un partido cu no a participa na eleccion 2017 y a haya asiento.
Mike Eman a nenga di drenta Parlamento sin ningun excusa. El a nenga e posicion cu el a bisa cu e lo ocupa y a entrega su asiento na otro persona.
Ley no conoce e wega aki y solamente conoce posibilidad pa un persona nenga di drenta Parlamento pa un motibo valido y no pa e sigui hunga lider di oposicion riba baricada.
Cu ta Mike Eman for di Parlamento ta dirigi fraccion di su partido den Parlamento, a keda demostra ora a bay defende Benny Sevinger.
Ley no ta laga duda. Ley ta sumamente cla loke ta haci cu e votado ta haya su mes den problema si e hunga cu Ley. Awor kico ta pasa cu e politico? Kico ta pasa cu e legislado cu kibra ley? E ta comete fraude?
Pregunta ta na Parlamento of na instancianan cu mester crea ainda pa asina investiga e legislador, e persona cu ta traha ley y no por ta riba ley!
