Parlamentario di AVP, Carlos Bermudez:
ORANJESTAD (AAN): Parlamentario di fraccion AVP, Carlos Bermudez, a expresa su preocupacion tocante e discusion reciente cu a bolbe surge rond di e tema di Rijkswet HOFA. Segun Bermudez, ta importante pa pueblo di Aruba tin claridad riba con e proceso aki a cuminsa y ken a pone e base p’e.
Recientemente, Bermudez a tuma nota cu 19 di februari ultimo, lider di fraccion di MEP, Evelyn Wever-Croes, a entrega un documento di mas o menos 100 pagina na Paul Rosenmüller, den cual nan ta expresa cu nan ta contra introduccion di un Rijkswet HOFA.
Segun Bermudez, e posicion aki ta causa confusion, pasobra tin documentonan oficial cu ta mustra claramente cu e proceso pa un Rijkswet a cuminsa durante e gobierno anterior bou mando di MEP.
“Mi persona kier presenta na pueblo di Aruba un documento di solamente tres pagina: e Bestuurlijk Akkoord. E documento aki a wordo firma pa Sra. Evelyn Wever-Croes dia 4 di juni 2024. Den e documento aki ta indica claramente cu lo sigui cu un Rijkswet,” Bermudez a declara.
E parlamentario di AVP a señala ademas tambe un documento prepara pa fraccion di MEP mes, den cual nan a elabora un timeline cu ta mustra e proceso entre 2020 y 2025 pa yega na un asina yama “Hybride Rijkswet”. Segun Bermudez, esaki ta confirma cu durante e periodo anterior a forma un ekipo di profesional na Aruba cu a negocia cu representantenan di Hulanda tocante e tema aki.
“Ta dificil pa compronde con awe nos ta mira un documento di 100 pagina caminda nan ta declara cu nan ta contra algo cu nan mes a cuminsa negocia anteriormente,” Bermudez a indica.
E parlamentario a recorda tambe cu durante e gobierno anterior frecuentemente a destaca e beneficio financiero di e acuerdo cu Hulanda, incluyendo e interes mas abou riba debe di Aruba, algo cu segun Bermudez, tur esunnan di MEP tabata pronkia cu ne como un logro importante.
“Awe cu e gobierno a cambia, di repente e mesun proceso no ta bon mas. Pero pueblo mester corda claramente: dia 4 di juni 2024 e Bestuurlijk Akkoord a wordo firma, y sin e acuerdo aki, awe nos no lo tabata den un discusion tocante un Rijkswet,” Bermudez a enfatisa.
Segun e parlamentario di AVP, ora un pais entra den un proceso serio di negociacion cu Hulanda, esaki ta un proceso institucional cu no por wordo trata cu ligereza. “Un proceso manera esaki no ta algo cu bo simplemente por bandona. Ta trata di un trayecto formal entre paisnan den di Reino, y mester trat’e cu responsabilidad y transparencia,” Bermudez a indica.
“Ta mescos cu bo ta bay un car dealer, nan bisa bo cu bo ta haya bo auto na october, anto na januari bo ta cuminsa paga; entrega e auto na januari, wak si nan ta tuma e auto bek. No, pasobra e proceso a cuminsa cana. Ta un asunto serio,” Bermudez a duna como ehempel.
Finalmente, e parlamentario a confirma cu fraccion AVP den Parlamento di Aruba ta warda riba e conseho oficial di Raad van State tocante e proceso y e posibel legislacion. “Nos ta kere cu e conseho di Raad van State lo ta importante pa duna mas claridad riba e siguiente pasonan den e proceso aki,” Bermudez a conclui.
