ORANJESTAD (AAN) – Prome Minister Evelyn Wever-Croes, den conferencia di prensa di gobierno Dialuna, a bisa cu gobierno ta duna special prioridad na e muchanan y e proteccion cu nan merece.
“E muchanan ta mira nos como adulto pa nos proteha nan y no ta tur ora nos ta cumpli cu nan. Riba e tema aki, hopi paso a wordo tuma, hopi cambio a bin na vigor, talvez nos no ta cla ainda, pero trabao tin y sigur nos a haci hopi”, Minister Presidente a menciona.
El a agrega cu di parti di su ministerio, ora cu el a wak cu Ministerio di Husticia y Ministerio di Asunto Social ta trahando hunto den e ambitonan legal y social, el a bin cu un Comision Nacional di Abuso di Menor cu ta mira pa e trabaonan ta mas “streamline” cu otro, pa full gobierno tin atencion riba esaki.
E mandatario a menciona cu tin cuater ministerio ta trahando riba e tema aki, incluyendo Ministerio di Salud Publico.
“Na aña 2018 nos a haci un investigacion kico por a bay fout den e caso di e dos angelitonan, nos a siña di nos erornan. Na November di aña 2020 tambe, nos a cuminza otro investigacion, of entrevista mas bien, cu tur e stakeholders cu ta traha riba e tereno aki, pa asina por tin un conseho imparcial con nos por sigui mehora, pasobra nos no ta kere cu nos a yega ainda, nos tin cu sigui mehora. Tambe nos ta trahando cu instancianan similar na Curacao y na Merca, pa asina por siña di nan tambe.
“Nos lo continua cu e trayecto social importante aki. Nos a haci hopi y ainda tin pa haci, specialmente riba e tereno di prevencion y educacion; pero nos no por hacie nos so. Nos mester di bo pa nos hacie. Profesionalnan ta informa nos, cu 99% di e casonan di abuso sexual di mucha ta tuma lugar, door di un abusador cu ta cerca den e famia; un conoci di e tata, e mama of e welonan, un familiar, un amigo, un colega. Gobierno no por yuda den esey. Nos mester di bo pa yuda nos cu esaki. Ami mester di bo pa nos cuida nos muchanan. Si bo ta un mama, un tanta, madrina, prima, omo, padrino, ruman, colega, amigo, esaki ta e yamada cu mi ta haci na abo pa bo yuda nos cuida nos muchanan. Gobierno no por haci esey. Gobierno a haci tur loke e por a haci y nos lo sigui hacie, pero nos mester di bo aworaki pa yuda cuida nos muchanan, mi ta conta cu bo den e lucha aki”, Minister Presidente Evelyn Wever-Croes a enfatiza.
