Parlamentario Evelyn Wever-Croes
ORANJESTAD (AAN): Den conferencia di prensa diabierna ultimo di Fraccion di MEP den Parlamento, Parlamentario Evelyn Wever-Croes a expresa cu Hulanda no ta aprecia manipulacion di gobiernonan. Esaki, despues cu e Parlamentario a tuma nota di declaracion di Prome Minister Mike Eman kende a bisa cu e ta haya cu e acuerdo cu AVP-Futuro a firma ta bon pasobra e ta busca paz den Reino y un bon relacion cu Hulanda. E Parlamentario ta cuestiona esaki expresando cu gobierno ta busca paz den Reino y ta busca guera y discordia na Aruba.
“Mi ta sigur cu na e momento cu Hulanda haya sa cu gobierno a manipula y gaña nan cu tin consensus di Parlamento, Hulanda lo tuma nan hopi na malo. Esaki ta e mesun direccion cu AVP a tuma algun aña pasa den gabinetenan Eman, unda cu nan a entrega Hulanda tur cos cu a conduci na un KB y un welga di hamber den cua ocacion Mike Eman a yama Hulanda pa abusador”, Parlamentario Wever-Croes a expresa.
E Parlamentario a remarca cu Minister Geoffrey Wever cu awo ta den Gobierno cu AVP, tawata testigo di tur e bon relacionnan di Gabinete Wever-Croes II cu Hulanda y den e negociacionnan cu a tuma luga cu Hulanda. Ta incomprendibel e ora con AVP-Futuro por haci erornan asina. “Si nan ta kere cu loke cu nan a haci ta duna nan confiansa na Hulanda, nan ta ekiboca”, e parlamentario a agrega.
Parlamentario Wever-Croes a enfatisa cu Hulandesnan no ta gusta cosnan tras di lomba di Parlamento. Hulanda ta para strit riba procedura. “Mi tin sigur cu na e momentonan aki tin combersacionnan basta pisa cu tin cu bay tuma luga y no lo straña mi si Hulanda manda yama nan pa papia dicon e forma aki a wordo encamina”.
