Parlamentario Setty Yarzagaray:
ORANJESTAD (AAN) – Parlamentario Setty Christiaans- Yarzagaray, den conferencia di prensa di fraccion di MEP di Diaranzon, a elabora tocante e surplus crea pa gobierno durante tres aña consecutivo, y con a logra esaki.
El a splica cu gobierno tin un bista multi-anual tocante con nan proyeccionnan financiero ta bay ta.
El a comenta cu den 43 aña di Pais Aruba, tres biaha a logra surplus, anto no structural. Esey ta pasa ora Gobiernonan ta traha presupuesto di un aña pa un aña, pero nunca tin un mira mas dilanti con ta proyecta con bo ta bay gasta bo placa of realiza proyectonan.
Si bo keda biba dia pa dia, manera en principio hopi hogar tambe ta haci, nunca bo ta logra cosnan structural of cosnan grandi pa bo pais, segun e Parlamentario a indica.
“Pues, esey ta e meta principal, y nos ta wak’e tambe den presupuesto pasobra antes nos tabata ricibi presupuestonan cu bista multi anual, awo for di un par di aña tambe nos ta ricibi esaki, riba recomendacion di tanto IMF como y De Nederlandse Bank; gobierno ta cumpliendo cu recomendacionnan di institutonan internacional pa por yud’e tambe riba su liña y yega na finanzanan publico balansa, sostenibel pero tambe responsabel”, Setty Cristiaans- Yarzagaray a señala.
El a sigui bisa cu ora e ta scucha critica tocante surplus su contesta ta: “Si mi planta un semia awe, mi no ta haya fruta mañan. Si mi planta un semia awe, mi tin cu warda e planta crece, mi tin cu lagu’e bira grandi, mi tin cu lagu’e duna fruta”. El a bisa cu esey ta pasa cu finanzas publico. Mescos ora crea debe y no a pagu’e mesora, e ta bin pa consecuencia di otro gobernacionnan.
“Hopi biaha ta continuacion, pero ora bo no t’ey bo no ta pag’e mas, anto despues bo tin cu introduci reformanan con pa wanta bo cabes riba awa, pasobra bo ta t’ekinan cu debe. A yega ora pa baha e debe, pa hustamente crea espacio pa inverti den proyectonan, dedica na areanan di atencion cu comunidad tin necesidad den dje, pero atrobe ta e semianan cu nos a cab’i planta, cu gobierno a cab’i planta responsablemente, pensando cu den futuro, tur e semianan aki ta bay duna fruta”, e parlamentario a señala, agregando cu si no ta muha e mata structuralmente, bo no ta hay semia tampoco.
El a remarca cu tur cos cu bo ta haci awe tin consecuencianan pa e añanan cu ta bin. “Pues ora nos tuma un bon decision positivo awe nos lo no ta wak e fruta, enberdad, mesora pe hecho cu e gobierno aki por tin un surplus den tres biaha consecutivo, siendo cu den 34 aña, tres aña sporadicamente, y puntra cual tabata e signature. Anto nos por bisa cu awo tin un structura den finanzanan publico, awo tin seriedad y responsabilizacion corecto cu ta tumando lugar”, Setty Christiaans- Yarzagaray, di fraccion di MEP a remarca.
