ORANJESTAD (AAN)—Den conferencia di prensa di fraccion di MEP, di Diaranzon 18 di September awo, e damanan Parlamentario Setty Christiaans-Yarzagaray y Shailiny Tromp-Lee a hiba palabra.
Christiaans-Yarzagaray a elabora tocante presupuesto di Aruba. El a bisa cu otro siman, dia 25, nan mester entrega pregunta como Parlamento, riba presupuesto 2025.
Aworaki nan ta pasando rond di e ley aki y e kier a para keto riba un componente hopi importante cu e ta haya y ta sinti, cu no ta wordo compronde totalmente.
Esaki pasobra e comentario y criticanan cu e ta scucha tocante cu gobierno ta logra surplus e no ta haya na su lugar, of por ta no ta wordo compronde bon, y e ta haya hopi importante pa splica esaki.
“Pakico un pais mester produci surplus y pakico esaki ta e di tres biaha? Surplus, na prome lugar, y mi kier haci’e hopi simple, ta wordo logra ora bo tin un entrada y gasto, logicamente. Y ora cu bo entrada ta pasa mas cu bo gastonan usual den bo cas, pero tambe bo tin bo hipoteca, bo fianzanan, pasobra bo gastonan por ta di utilidad, cuminda, scol, gasoline, etc., pero e prome cos cu den un hogar bo ta paga ta bo hipoteca cu bo leiningnan, pasobra bo no kier haya bo mes den problema. Den gobierno ta contrario.
Den e operacion di un pais, di un gobierno, nan ta purba paga salario, gastonan operacional, huur di gebouw, etc., y ultimo cos cu nan ta paga ta nan lening. Si no resta placa despues di e entrada y e gastonan cu ta paga, nunca bo debe ta baha. Pues, e meta pakico na final cu bo ta balansa y bo ta yega na e surplus aki, ta pasobra e surplus a sirbi pa paga bo debenan” Setty Yarzagaray a indica.
El a bisa cu e no kier bay ni na retorica di con e debe a keda despues di gobernacion di Mike Eman 1 y 2.
“Djis imagina si nos debe tabata surpasa 80% di DGP, si e diferencia so gobierno tabata tin pa opera du ne, djis imagina si nunca bo bah’e. Con bo ta haya espacio pa bo dedica na inversionnan? Con bo ta haya espacio pa dedica na cosnan cu pueblo ta haya importante, pa atende cu ne? Esey ta e meta di un surplus. Si nunca bo ta yega na bah’e nunca bo no ta crea espacio pa duna bek”, e Parlamentario a subraya. (Mas den nos siguiente edicion).
