Lider di partido: Evelyn Wever-Croes
ORANJESTAD (AAN): Diahuebs mainta, Lider di partido Movimento Electoral di Pueblo (MEP) Evelyn Wever-Croes, a tene un conferencia di prensa na Cede di MEP, pa asina duna informacion di kico partido ta haciendo en conexion cu preparacion pa campaña electoral 2024.
Candidatonan nobo riba lista
Lider di partido a splica cu pa loke ta trata e lista di partido, tin un total di 10 pa 11 vacatura cu lo mester yena pa cu Eleccion 2024. Pa cu esaki tin un comision encarga cu a cuminsa ya caba 1 aña pasa pa sondia participantenan capas y determina pa traha na bienestar di pais Aruba.
Mirando cu e fecha di eleccion a cambia y lo ta mas trempan di loke a premira, e comision a intensiva e proceso aki, pa asina por completa e lista lo mas pronto cu ta posibel.
Lider di partido a indica cu durante e proceso pa busca candidatura pa e lista di MEP, por a nota cu tin hopi entusiasmo eyfo di hende dedica y bon prepara pa asumi e retonan grandi cu pais Aruba ta enfrentando. E meta di partido MEP ta pa lansa su candidatonan nobo den e proximo dianan.
Programa di Partido
E comision encarga cu e programa di partido ta trahando incansabel pa por termina y bin cu e miho programa di partdio pa Eleccion 2024 lo mas pronto posibel. Na e momentonan aki ainda e comision ta den e fase di "brainstorming", pero cu e meta di por finalisa e programa y present'e na comunidad dentro di mas o menos 1 luna, informando pueblo en general riba kico ta e vision di partido MEP drentando campaña 2024.
Comision di campaña
Pa loke ta e campaña mes, partido MEP tambe tin un comision trahando riba esaki. E comision aki ta encarga pa delinea cua ta e miho forma pa ehecuta e strategia di campaña, treciendo asina, di e miho manera, e mensahe di partido MEP na tur ciudadano di pais Aruba.
"Ta berdad cu tur e metanan di partido MEP no a wordo realisa ainda, pero nos ta logrando si. Despues di a saca pais Aruba di e crisis financiero cu e tabata aden, danki primeramente na e gobierno anterior di asignatura berde y despues na e pandemia, a logra stabilisa e pais pa asina por sigui traha na progreso y bienestar di cada ciudadano. Lamentablemente nos gobierno a cay debi cu nos partner di coalicion a kibra palabracionnan fundamental cu bo mester tene bo mes na dje pa wanta un gobierno, hibando nos asina na urna electoral dia 6 di december proximo.
Pa cu esaki, den tur humildad, partido MEP ta bati na bo porta pa bo voto di confiansa, pa nos por finalisa e trabounan cu nos a cuminsa. Nos ta determina pa sigui traha cu e mesun pasion y determinacion pa tur ciudadano di pais Aruba sinti e progreso y bienestar den nan hogar", Lider di partido a expresa.
