Parlamentario Shailiny Tromp-Lee:
ORANJESTAD (AAN): Parlamentario Shailiny Tromp-Lee den un entrevista recien a remarca cu pueblo di Aruba mester haci un pregunta crucial riba consensus di HOFA y tuma conclusionnan a base di con e proceso real cu Gobierno a encamina.
Gobierno ya dia 13 di augustus a bay di acuerdo y a firma HOFA, cu ta devastador pa nos pais y ta mina nos autonomia, sin ni un dia informa, involucra y mucho menos busca consensus di Parlamento, manera cu mester a tuma luga segun e palabracionnan haci entre e paisnan den Reino. Parlamento niun momento a aprobra esaki.
E pregunta crucial cu pueblo mester haci Gobierno ap loke ta trata e proceso encamina pa Gobierno mester ta e ora, ‘Ta consensus di ken Gobierno tawatin pa firma y entrega e consensus rijkswet HOFA?”.
E delegacion di parlamentarionan di Aruba ta sali pa Hulanda diadomingo 21 di september pa atende cu e reunionnan tripartiet y di IPKO. Y apesar di varios intento pa Presidente di Parlamento yama reunion pa trata e consensus rijkswet HOFA prome cu IPKO, no a haci esaki.
E conclusionnan cu por saca afo di esaki ta cu Gobierno lo mester tawatin miedo pa no a bay Parlamento como debe ser pa atende cu e rijkswet y busca aprobracion di Parlamento prome cu nan a bay di acuerdo.
Un otro conclusion ta cu Presidente di Parlamento tambe lo tawata tin miedo y no a yama e reunion publico pa atende cu e situacion inaceptabel y inhustificabel di e proceso encamina pa Gobierno. Esaki ta un muestra cu e no ta para pa credibilidad di Parlamento y democracia parlamentario, apesar cu tin miembronan di AVP cu tampoco ta di acuerdo cu e proceso encamina pa Gobierno. Lastimamente, Tromp-Lee a expresa, nan no tin e curashi pa bisa esaki publicamente y mucho menos haci loke ta corecto y para pa credibilidad y democracia parlamentario.
“Un mensahe mi tin pa nan, awo ta e momento pa nos tur bisti e pechi di Aruba y para pa nos autonomia. Para pa nos Status Aparte. Para pa bienestar general na luga di bienestar di partido y esun personal pa sigui maneha nos pais na beneficio propio. Pasobra ni cuanto nan purba hustifica, ni cuanto video nan traha, ni cuanto nan kier tira e fout riba Lider di MEP, ni cuanto nan sigui gaña cu e tawata un ‘done deal’ caba door di Gabinete Wever-Croes, e hecho ta y ta keda, Gabinete AVP-FUTURO no tawatin y ainda no tin consensus di Parlamento pa bay di acuerdo cu e consensus rijkswet HOFA”, Parlamentario Tromp-Lee a agrega.
