ORANJESTAD (AN) – Dialuna mainta tabata tin e prome conferencia semanal di Gobierno, unda a cuminza cu Prome Minister Evelyn Wever-Croes cu a trata e tema di abuso sexual di
menor y kico ta e trabao cu gobierno y instancianan concerni ta haciendo al respecto.
MEP FOR DI PARLAMENTO:
Prome, Minister Presidente a para un rato keto pa bay bek tempo atras, cu MEP tabata den Parlamento como fraccion di oposicion.
Abuso sexual di menor tabata un tema cu for di e tempo ey a cuminza demanda atencion; y el a menciona cu tanto su persona como su colega Andin Bikker desde oposicion, y despues reinforsa pa nan colega Glenbert Croes, ora el a drenta den oposicion na 2013, nan tres a sigui traha riba e tema menciona.
“Nos a bin cu ley di iniciativa, a reuni cu stakeholders, pero lamentablemente e tempo ey no tabata tin oido den gobierno, pa por a finaliza e trabaonan aki”, e mandatario a subraya.
CU MEP DEN GOBIERNO DESDE 2017:
Ora MEP a drenta den gobierno na aña 2017 nan a bin ta encontra hopi reto, locual Prome Minister ta splica asina aki: “Nos a encontra reto financiero, unda cu nos mester a transforma un deficit di 444 miyon florin den un surplus di 46 miyon florin, aña pasa.
Nos a bin topa cu un crisis social. Di facto nos no por yame crisis social sino un explosion social, y nos a inverti den Social Crisis Plan. Nos a pone 36 miyon florin disponible y aworaki, ya caba 26 miyon florin a wordo inverti den 33 proyecto y tres programa y ainda tin 10 miyon disponibel e aña aki, pa sigui combati e problemanan social di nos pais”, Minister Wever-Croes a señala.
Minister Presidente a agrega cu gobierno a atende cu crisis a consecuencia di e situacion politico na Venezuela, cu a haci un impacto na Aruba. Ademas a confronta crisis cu Hulanda, kiermen, un crisis tras di otro.
“Despues a bin e pandemia. Aña pasa e pandemia a bati na nos porta, y esey a exigi tur atencion. Y mi ta bisa danki Dios y danki na profesionalnan cu a traha hopi duro riba e Social Crisis Plan aki, desde 2017 cu nos por a brinda cabes na e problemanan social cu a bin cu e pandemia” Minister Wever-Croes a señala.
E dignatario a bisa cu e pandemia enberdad, a trece cune hopi reto riba tereno di salud, tambe riba tereno economico, y e reto di mas preocupante ta e salud mental di nos hendenan y con el a wordo afecta door di e pandemia.
“Pero danki Dios nos a crea un fundeshi cu e Social Crisis Plan. Nos no a soluciona tur problema ainda; hopi aña di negligencia bo no por soluciona den apenas algun luna, pero si el a haci nos mas disponible pa por atende cu e retonan aki. Nos gobierno ta pone e ser humano central y esey ta locual nos ta haci for di principio”, Prome Minister a remarca, agregando cu apesar di tur e retonan cu el a menciona, gobierno ta sigui pone e ser humano central y prioridad special riba nos muchanan y e proteccion cu nan merece.
