ORANJESTAD (AAN) – Glenda Hernandez, director di Departamento di Asunto Social, a hiba palabra den conferencia di prensa di gobierno, Dialuna mainta, unda el a duna un update di e “Social
Crisis Plan”.
Señora Hernandez a expresa cu DAS tin basta tempo sin duna un update pero comunidad por ta sigur cu nan a sigui traha apesar di e pandemia. El a duna un resumen di locual a haci desde final di 2018 te aworaki.
Hernandez a splica cu nan ta trahando manera un tabel cu e “Inspire strategies” cu ta e siete strategianan di UNICEF; un modelo original di e Organizacion Mundial di Salud, cu ta pone den un plachi kico ta e riesgonan di mas grandi cu mester combati ora di papia riba violencia contra mucha.
Esaki kiermen cu pa tin exito den e lucha aki mester haci escogencia riba kico bo ta bay haci contra abuso y violencia contra mucha.
Esaki ta abarca kico ta bay haci como programa, con ta bay inverti placa den cierto proyectonan y programa.
Social Crisis Plan a desaroya 31 proyecto na cierto prioridadnan cu nan ta tumando lugar, aworaki. Director di DAS a pasa door di e puntonan di riesgo cu mester tin consideracion cu nan si kier traha efectivo. Kiermen, pa haya resultadonan pa por cambia e situacion. “Esey no kiermen cu den dos aña y mey nos a soluciona e problemanan pasobra nan ta compleho y riba diferente nivel.
E ta riba nivel di cas, di sociedad, di institucion y di nos leynan”, señora Hernandez a splica.
E leynan mester ta in place pa combati e violencia contra menor: “Nos a tuma cierto leynan den desaroyo. Nos a keda traha continuamente den background riba e leynan aki”.
Norma y balornan: “Con nos sociedad ta wak violencia contra mucha y hoben; con nos sociedad ta wak violencia contra hende muher. Nos ta acepta esey? Nos ta haya esey normal? Mi ta contento di mira cu, ora algo asina pasa cu un mucha, un hende muher of un hende homber cu ta wordo gedal, viola of abusa, e sociedad ta reacciona fuertemente? Pasobra esey ta un cambio cu antes no tabata tin. Antes, nos tabata keda trankil, nos ta papie na cas pero e no ta sali afo. Esaki mi ta wak’e como un señal positivo, cu nos norma y balornan ta cambiando.
Structura: E ta duna e importancia tambe pa bo como mayor wak ki sorto di norma y balornan bo ta aplica den e crianza di bo yiunan. Mucha mester di structura y nos ta wak cu hopi mucha cu ta bay fout, no ta haya structura na cas. Pa bo duna structura bo ta duna claridad riba kico por y kico no por. Hopi biaha tin casonan cu, desafortunadamente, e mayornan no a duna nan yiunan structura den nan guia y crianza.
Ambiente sigur (safe environment): Esey ta na unda e mucha ta pertenece, ta hunga, siña, come, bebe, cu mester crea un ambiente sano y sigur.
“Si nos como mayornan no por haci esey, esey kiermen cu e mucha tin cu bringa contra tur e inseguridadnan y violencia contra nan. Esey ta hopi pisa pa un mucha of un hoben, Nos mester brinda atencion na esey”, señora Hernandez a declara.
