ORANJESTAD (AAN): Diahuebs mainta durante un conferencia di prensa riba e Crisis Plan Social, Yvonne Bermudez di Centro pa Hoben y Famia a papia di e trabaonan cu e centro ta
haciendo.
“Centro pa Hoben y Famia ta activo desde Juni 2020 y ta situa na Sabana Blanco 68-C”.
Esaki ta un centro multidisciplinario unda cu diferente instancia preventivo a uni pa traha hunto bao di un solo dak pa ofrece comunidad diferente servicio.
Nos ta yame un ‘one stop shop’ pa e cliente, segun Bermudez.
El a splica cu e instancianan cu actualmente ta forma parti di Centro di Hoben y Famia ta:
Tienda di Educacion, Fundacion Respetami, Fundacion Anti Droga Aruba, Fundacion Pa Nos Muchanan, Departamento pa Asuntonan Social, Wit Gele Kruis y Fundacion ADRA.
“E meta di e centro aki ta pa informa, educa, sostene y guia a mucha, e hoben, e famia y e educadornan riba temanan cu tin di haber cu lantamento di mucha”.
E centro a wordo lanta a base di peticion di comunidad y di e profesionalnan cu a expresa nan deseonan pa bin cu un concepto asina, na unda na un solo localidad por encontra diferente servicio, segun Bermudez.
El a sigui bisa cu na e localidad por haya informacion, conseho y guia riba e tereno di educacion, droga, adiccion, embarazo, abuso di mucha, famia saludable y divorcio.
Tambe mamanan hoben ta haya un trayecto di guia, mientras cu pronto ta bay tin tambe un trayecto di guia pa tatanan hoben.
Bermudez a splica cu na e centro ta duna tambe diferente workshop pa mucha, hoben, adulto y pa parehanan.
“Durante e temporada di vacacion tin campnan pa e mucha y hobennan asisti”, segun Bermudez.
