“A yega ora di redefini kico progreso kiermen pa Aruba y nos hendenan”

Ursell Arends, Partido RAIZ:

• 
•  

ORANJESTAD (AAN)— Ursell Arends, lider di Partido Raiz, ta comenta den un relato pa Matutino DIARIO, cu e sentimento general cu ta biba den nos comunidad, pa loke ta “sobre desaroyo” y “sobre turismo” dificilmente por sigui wordo ignora.

“Locual un tempo tabata un fluho di bishitante manehabel pa Aruba su habitantenan, ultimamente a bira un fluho di bishitante cu ya no ta sostenibel mas y cu ta menaza e mesun fabrica di e Isla: su naturaleza, su cultura, y e calidad di bida cu ta hiba na Aruba.

“Mas y mas, nos ta mira e comunidad di Aruba lanta contra e desaroyo di mas hotel y mas acomodacion alternativo na Aruba, pasobra ya no por sostene e fluho di bishitante.

“Mientras ta gaba cu Aruba ta surpasa expectativa di bishitante, of cu Aruba a wordo corona e mas busca pa bishita den Caribe, Arubianonan ta haci nan mes e pregunta ‘a costo di kico’?” Ursel Arends ta relata.

El a sigui expresa cu pa patras di numbernan cu ta kibra record y cu ta sona impresionante, ta crece un desconexion entre locual ta wordo mira como exito y e experiencia cu e comunidad ta biba tur dia. Pa algun, esaki ta nifica progreso, mientras cu pa mayoria, esaki ta un preocupacion grandi.

“Cu masdi 4.000 camber di hotel y acomodacion alternativo den desaroyo, hopi den nos comunidad ta pone man na curazon pasobra no sa con ta bay maneha e fluho di bishitante ni tampoco e impacto mas grandi cu ya caba ta sinti den bida diario”, señor Arends a señala.

Cu e infrastructura di Aruba, cu ya caba ta bao impacto lo por sostene e crecemento? Kico lo keda di Aruba su naturaleza, cultura, y esencia di ta Arubiano? Y mas importante ainda, pa ken e crecemento akinan berdaderamente ta?

 “Mas y mas nos ta wak e comunidad di Aruba pusha bek contra desaroyo. Na Eagle Beach, Palm Beach, Baby Beach, na costa di Aruba y mucho mas. E no ta un protesta contra turismo, e comunidad ta defende nan calidad di bida, acceso na lama cu ta di cada un Arubiano, y un futuro sostenible pa nan yiunan y e proximo generacion”, Ursel Arends a subraya.

 

• 
•