“RAIZ ta para pa un bida digno pa cada ciudadano di Aruba”

Lider di Partido RAIZ, Ursell Arends:

*Creando armonia entre naturaleza y crecemento economico 

ORANJESTAD (AAN) – Lider di Partido RAIZ, Ursell Arends, den su relato pa Matutino DIARIO, unda e ta bisa cu mas y mas por wak cu e comunidad di Aruba ta pusha bek contra desaroyo, el a sigui bisa cu na luga di scucha, ta wak cu ta  promove un storia di exito cu ta mara na number y popularidad, manera cantidad di yegada di turista, porcentahe di cambernan ocupa, mientras ta faya pa adresa e impacto mas grandi cu turismo ta causando.

“RAIZ ta para pa un bida digno pa cada ciudadano di Aruba creando armonia entre naturaleza y crecemento economico. Un bida unda cu dignidad financiero ta reina, pa logra un sociedad unda tur ciudadano tin e posibilidad pa biba independiente, desaroya nan habilidad y creando oportunidad pa bienestar, armonia y prosperidad pa tur ciudadano.  RAIZ kier mira un modelo di turismo nobo pa Aruba unda cu ta bay na maneha  turismo y no promove mas turismo, ni cu ta mercado nobo of no”, lider di RAIZ a remarca.

RAIZ ta propone riba termino corto:

1. Reinforza e ley di “Build with Nature”. E maneho aki ta stipula den ley desde 2019 pero no ta wordo reforza debidamente. Reforzando esaki pa e “optienan” (proyectonan nobo) di construccion pa hotelnan nobo, lo haci e construccion di edificio, por ehemplo, door di uza criteria di LEED, hopi mas caro pa desaroyadornan. “E consecuencia directo lo ta cu sea cu e desaroyador no ta haci uso mas di su “pti” of e ta toch haci uso di dje, pero cumpliendo cu regulacion di edificionan cu ta den relacion cu naturaleza y segun condicionnan mas sostenible.
2. Pone un paro na benta di casnan cu stranhero cu tin e proposito di negoshi manera AirBnB. “E situacion aki ta contradictorio na nos leynan actual di economia. Den esaki un stranhero no por habri un negoshi na Aruba, sin pidi un ‘vestigingsvergunning’ na Departamento di Economia. Pero den caso di casnan si esaki ta parce di ta posible sin ningun regulacion of control” Arends a señala.
3. Proteccion di berdad pa naturaleza di Aruba y no solamente den areanan proteha caba. “Mester tin un modelo di desaroyo unda cu ta contribui na un Aruba unda cu naturaleza ta central (Nature Inclusive) pero unda cu naturaleza tambe tin su bos. E ley di ROP y ROPV tin cu wordo renoba den 2026, y esaki ta crea un momento pa actua y involucra nos hendenan”, el a enfatiza. Ademas, e ley di “Rights of Nature” a ser laga den fase final p’asina duna naturaleza un bos di berdad. Ta boga pa sigui cu e finalizacion y manda esaki pa Raad van Advies.