Parlamentario John Hart:
ORANJESTAD (AAN): Durante e sesion publico di Parlamento di Aruba, Parlamentario John Hart di partido AVP a enfatisa cu e momento a yega pa tin madurez politico den e sala di Parlamento. Segun Hart, e pueblo di Aruba ta merece miho, y esey ta cuminsa ora cu lider politico ta asumi responsabilidad y papia berdad.
Hart a indica cu durante e debate tocante e Rijkswet Houdbare Overheidsfinanciën Aruba (HOFA), e fraccion di MEP a yega cu un retorica politico cu ta purba pa troce e realidad. “Nan kier purba laga kere cu e Bestuurlijk Akkoord, cu e ex-Prime Minister a firma na juni 2024, no ta relevante. Pero e echo ta cla, señor presidente: e Bestuurlijk Akkoord ta e fundeshi pa e cuadro legal, e esencia mes pa e ley di HOFA,” Hart a declara.
Segun e parlamentario di AVP, madurez politico ta cuminsa cu sinceridad. “Si nos kier eleva e nivel politico na Aruba, mester tin madurez politico. Y madurez politico ta cuminsa na papia berdad, na reconoce realidad y na asumi responsabilidad,” el a agrega. Hart a lamenta cu hopi bes politiconan no ke tuma responsabilidad pa decision cu nan mes a tuma, y preferi schuif responsabilidadnan of busca otronan pa culpa.
El a pone un paralelo cla entre e manera cu nos ta maneha nos politica y e situacion actual den comunidad. “E mesun mentalidad di no tuma responsabilidad bo ta wak back den diferente area den nos pais: decadencia den barionan, falta di compromiso den mantenimento di infrastructura, y edificionan publico cu ta deteriora. Esaki ta e resultado di irresponsabilidad y mal planificacion. Ta ora pa pone ordo back riba e pais aki,” Hart a enfatisa.
Hart a sigui splica cu e Bestuurlijk Akkoord firma riba 4 di juni 2024 entre e gobierno di Aruba y Hulanda ta e base di e proceso actual y ta crea e marco legal pa e dos conceptonan di ley cu ta canando. El a aclaria tambe cu ambos ley ainda tin cu pasa pa e proceso di Raad van Advies na Aruba y Raad van State na Hulanda, pa asina por haya un evaluacion formal y definitivo.
E parlamentario a conclui: “Nos mester pone pais prome cu partido, berdad prome cu propaganda y responsabilidad prome di retorica”.
