ORANJESTAD (AAN): Den fin di siman, Prome Minister Evelyn Wever-Croes a entrega e Rapport Forensico, cu a worde haci riba RDA na Presidente di Parlamento,
Señor Ady Thijsen.
Parlamento di Aruba na April 2020, durante un reunion publico, a haci e peticion aki pa medio di un mocion entrega considerando cu segun Parlamentarionan ya ta basta di scucha tur loke a pasa den e compania RDA y nan kier un rapport forensico.
E rapport a tarda 3 luna y e pandemia tabata un factor grandi den e tardansa. Prome Minister a duna di conoce cu segun el a comprende, cu e falta di cooperacion di cierto actornan importante den e investigacion a causa tardansa tambe. Prome Minister a indica cu tur Parlamentario por lesa den e rapport cual ta e autornan cu no kier a coopera y cual ta e autornan cu a tarda e investigacion.
Riba e USB memory stick cu Prome Minister a entrega na Presidente di Parlamento, tin dos rapport di cual uno ta e rapport forensico mes riba tur loke a socode den RDA desde e incorporacion na October 2016 y Februari 2018 cu Prome Minister a dicidi di cambia e hunta di comisario pa pone un paro na tur loke tabata pasando.
“Ta un aña y mei mas o menos caminda tabata tin 21 miyon Florin den e compania (Valero) cu a desaparece den 16 luna. Ora e suma di 21 miyon desaparece den e compania ta pasobra bo ta haya algo back pero akinan no tin nada cu a haya back. Ora bo puntra pa wak e contractnan di consultants, tampoco tin nada”, Prome Minister a duna di conoce.
E di dos rapport ta esun di RDA na unda e 21 miyon Florin aki a worde gasta te cu Februari 2018. Tambe tin un rapport di IT pasobra na momento cu a cuminsa cu investigacion cierto hendenan a delete cierto filenan. Dus tin un rapport riba e computernan cu ta mustra cu tin cosnan ta pasando.
“Mi ta entrega e rapportnan aki na Parlamento awe y mi ta bisa tambe como Gobierno, como representante y accionista, cu mi a papia cu hunta di directiva na momento cu nan a entrega mi e rapport y mi a bisa nan pa asegura cu nunca mas e cosnan aki pasa den RDA y esnan responsabel mester worde teni responsabel. Esaki ta hopi placa cu por a worde uza den cosnan importante. Como Gobierno ami a pidi tambe Corporate Governance Commissie pa nan duna Gobierno conseho tambe pa asegura cu e cosnan aki no ta sosode den otro companianan estatal y pa percura cu nunca nan pasa. Mi a lesa kico tur a bay malo pero e importante ta cu nos a tuma accion”, Prome Minister Evelyn Wever-Croes a termina bisando.
