ORANJESTAD (AAN): Recherche di Santa Cruz a traha rapido riba e caso di asesinato cu a socede dos siman pasa,
esta Diaranson 22 di Juli 2026 banda di 9:55 pm riba e parkinglot banda pazuid di Stadion Nadi Croes/Crismo Angela na frontera di Macuarima cu Rooi Bosa.
Polis a yega eynan y bin haya e hoben Rayshon Kelly malamente herida cu impacto di bala na su curpa. E no tabata reaccionando. Paramediconan a hiba e hoben cu urgencia pa Hospital, unda algun rato despues Docternan a constata morto.
Seis detencion: E victima hoben Rayshon tin apenas 16 aña di edad, y un investigacion a start riba e causa di tur esaki. Polis na comienso a indica cu Rayshon tabata riba un motorcycle hunto cu un persona mas. Un auto cu 3 persona aden cu a yega, lo ta esnan cu a tira riba nan.
A compronde cu tin algun hipotesis riba loke a socede. Tin hendenan a bisa cu Rayshon ta un hoben cu hopi respet. Pero Recherche ta check tur angulo den e storianan aki, incluyendo un posibel envolvimento di caso di droga. Esaki ta un teoria cu no tin hopi aceptacion, pero autoridad hudicial tin di investiga toch.
Tambe tin e teoria cu Rayshon lo a ofrece un smartphone na benta riba Facebook, y un cumprado kier a bay mira e smartphone prome cu el a cumpre. Recherche ta check si acaso e asunto di “cumpra di Facebook marketplace” aki a tuma rumbo robez, y tambe ta check e posibilidad cu esnan den e auto tin nan modus operandi di bay check mercancia pa cumpra, y despues ta rek sali bay cu e mercancia sin paga.
Te cu fin di siman, un total di 6 persona a wordo deteni pa asina investiga e storia di cada uno. Esnan aresta ta e homber W.T., tambe e homber A.M. cu su pareha J.G. Tambe a aresta dos hende mas, incluyendo uno cu Grenspolitie a aresta ora e tabata cla pa subi vuelo rumbo pa Aeropuerto. Ministerio Publico ainda no a indica si acaso e persona aki ta un studiante of no cu ta regresando tera frieu pa sigui cu su scol.
E investigacionnan ta sigui, y te ora cu e caso aki presenta den Corte di Husticia, e ora finalmente Aruba lo haya sa den tur claridad di detaye, ta kico exactamente a socede cu mester a tira y mata Rayshon.
