ORANJESTAD (AAN): Diadomingo anochi e Centro di Operacion Maritimo (MOC) di Wardacosta a detecta
un boto sospechoso cu tabata navegando den direccion di Aruba.
MOC mesora a dirigi un boto di patruya di Wardacosta den direccion di e boto sospechoso. Wardacosta a informa Cuerpo Policial Aruba (KPA) cu di biaha a manda e helicopter di KPA pa detecta e boto sospechoso.
Segun informacionnan di Wardacosta, e boto sospechoso a wordo identifica como un boto cu probablemente tabata transportando bultonan di droga abordo. Nan a agrega cu 9 persona tabata abordo y tambe diferente pakete.
Wardacosta a cuminsa un persecucion cu e boto Metal Shark. Durante di e persecucion e personanan a tira algun pakete den lama. Despues cu a intercepta e boto, agentenan di Wardacosta a logra saca e paketenan for di lama y a tow e boto hiba na e pier di Wardacosta.
Na yegada na e pier di Wardacosta, e 9 persona y paketenan, cu ta trata di un cantidad substancial di droga, a keda entrega na KPA.
