Caso raro awor bao investigacion hudicial
ORANJESTAD (AAN): Tabata Diamars atardi banda di 6:10 pm, un unidad di Polis di Santa Cruz a ser manda na un adres na Kas Ariba pa un situacion raro, unda segun e prome informe, un mucha lo a tira riba su mama cu un arma tipo windbuks of algo parecido.
Polis a yega y topa cu Ambulans caba na e lugar y paramediconan tabata atende e señora. Despues e casa di e señora a yega cerca di Polis. E ciudadano a bisa cu e tabata den nan sala unda tur cos a socede. E ciudadano a bisa cu e tabatin un scopet di aire den su man, ora cu e tabata recoge varios material di eyden, incluyendo e scopet y un hamaca, hunto cu nan nieto, pa despues nan sali bay cana.
Despues el a bisa, cu mas despues e ta yamando su señora pa nan bay cana. Net ora cu e señora a drenta den sala cerca dje, e homber a declara cu sin ningun intencion, y inesperadamente su dede a mishi cu e ‘gai’ di e scopet, y e scopet a los tiro y e bala a bay dal den nek di e señora.
Den Ambulans, Polis a bay papia cu e señora pa haya sa e otro banda di medaya. El a declara cu e tabata pafo cu su nieto, y ora cu el a bay bek paden den sala, diripiente el a haya inmenso dolor na su nek.
Paramediconan no ta haya cu e señora su bida ta core peligro, pero ta importante pa bay cune Servicio di Emergencia di Hospital pa haci varios test.
Como cu e caso aki ta tiki raro pero serio, Polis a pone Recherche di Santa Cruz, y a notifica personal forensico di BFTO pa nan bay investiga e caso.
