WILLEMSTAD: Ta parce cu contrabandistanan a sigui purba nan suerte riba ultimo dianan di aña 2024,
pensando cu autoridad lo ta ‘drumi’. Pero hecho ta cu Diadomingo anochi, personal di Wardacosta di Caribe Hulandes a actua, asina cu riba radar a detecta un contacto sospechoso den cercania di Curaçao.
Asina cu Centro MOC a detecta esaki, nan a saca un boto di patruyahe Metal Shark pa nabega rapido den direccion di e boto desconoci. E avion di Wardacosta tambe a mobilisa den e area pa asina tuma nota di loke ta pasando.
E tripulantenan di e avion di Wardacosta a yega prome, y a mira cu e boto sospechoso aki ta dirigiendo su mes pa Curaçao. Finalmente e Metal Shark a yega cerca, y a obliga e boto aki pa stop. Un solo persona tabatin abordo.
Nan a lastra e boto aki pa e Pier di Wardacosta na Curaçao pa haci control. Ora di haci esaki, abordo a bin haya un cargamento di 25 kilo di cocaina. Tambe a haya 3 arma di candela, y monton di municion.
Tanto e homber Venezolano, cu e droga, arma, y municion a wordo pasa pa Polis di Curaçao pa investigacion. E droga mientras tanto ya a wordo kima, y e boto cu por mira riba e potret aki, a keda confisca.
