ORANJESTAD (AAN): Trafico tabata druk riba Diamars atardi, esta Bispo di Aña banda di 3:45 pm,
ora cu un empleada di pizzeria na Shiribana a haya ‘chance’ di otro chauffeur pa e sali di parkinglot y subi caminda pa bay direccion pariba.
Pero net ora cu e Toyota Yaris color blanco cu number A-8833 a sali, a bin resulta cu un motorcycle Suzuki Hayabusa color geel tabata pasando e fila di auto, y a bay dal fuertemente contra e auto. E motociclista a cay abao riba caminda, y prome personanan cu a yega a ripara cu e no ta comunica verbalmente, y mesora a core yama Polis.
Inmediatamente Central di Polis a manda dos unidad di Polis, fuera unidadnan motoriza pa yuda cu e fluho di trafico cu tabata realmente stagna.
Polis a yega y na e lugar aki, e dama di e Yaris a conta cu e la subi e caminda druk, momento cu un auto a dun'e chance pa subi. Aki ta unda e brommer a bin dal contra e parti dilanti basta duro y e motociclista a keda benta banda di e brommer.
Otro empleadonan di e pizzeria a bin pafo y a tuma over e diferente pizza cu e tabatin den e auto pa bay haci delivery.
Polis di trafico a sigui protocol y a laga e dama chauffeur supla na e Alco Sensor IV, y e test a sali bon.
Ambulance a presenta y mesora e Paramediconan a baha e brancard y por a mira nan yuda e motociclista lanta y subi e cama, pa despues transport'e pa Hospital.
